ChatGPT Ҳусанов гол урган жамоага манчестерлик футболчини жойлади

Англия футболида кўз кўриб, қулоқ эшитмаган воқеа юз берди. “Манчестер Юнайтед” тарбияланувчиси Деметри Митчелл ўзига сунъий интеллект – ҳаммага машҳур ChatGPT орқали янги жамоа топди.

28 ёшли манчестерлик футболчи бу ҳақда англиялик журналистларга маълум қилган.

- ChatGPT – энг яхши агент экан. Чунки у хизматлари учун комиссия пули талаб қилмайди. Менга иш топиб беришдан ташқари Лондондаги яшаш харажатлари, клубнинг иштирокидан келиб чиқиб қанча маош сўрашим тўғри бўлишини ҳисоб-китоб қилиб берди, - дейди Деметри Митчелл.

Маълумотларга қараганда, Митчелл ChatGPT орқали Англия чемпионатининг қуйи лигаларидан бири – League One ўйинларида қатнашиб келаётган “Лейтон Ориент” сафига қўшилган. Бу жамоа ўзбекистонлик футбол ишқибозларига ҳам яхши таниш.

Ўтган мавсум  “Манчестер Сити” Англия кубоги доирасида “Лейтон Ориент” билан куч синашишига тўғри келганди. Ўшанда “шаҳарликлар” сафига қўшилганига бир ой бўлган Абдуқодир Ҳусанов Лондондаги учрашувда майдонга тушиб, “Лейтон Ориент” дарвозасини ишғол қилганди.

Шу тариқа, Абдуқодир Ҳусанов Англия футболида гол урган биринчи ўзбек футболчиси сифатида номини тарихга ёздириб қўйган эди.

Деметри Митчеллнинг ўзи Манчестер шаҳрида туғилгани боис, “Юнайтед” академиясига борган. “Манчестер Юнайтед”нинг бир неча ёш тоифасидаги жамоаларида ўйнаган ярим ҳимоячи асосий таркибга кира олмаган.

Орада Шотландиянинг “Харт оф Мидл” жамоасида икки бор ижарада ўйнаб келган футболчи 2020 йили “Манчестер Юнайтед”ни эркин агент мақомида тарк этди. Кейинчалик Шотландиянинг “Хайберниан”, Англиянинг “Блэкпул” ва “Эксетер” жамоалари шарафини ҳимоя қилди.

Митчелл ўтган мавсум охирида “Эксетер” билан шартномаси якунланганидан кейин ишсиз қолганди. Бироқ сунъий интеллект ёрдамида “Лейтон Ориент” жамоасидан иш топди ва клуб билан 2027 йилнинг 30 июнигача давом этадиган шартнома имзолади.

Деметри Митчелл янги жамоасида мунтазам ўйин амалиётига эга бўлиб келмоқда. Ҳозирга қадар 28 ёшли ярим ҳимоячи барча турнирларда 11 та учрашувда иштирок этди.

Таъкидлаш жоизки, “Манчестер Юнайтед” мактабини ўтаган Деметри Митчел ўз даврида Англиянинг энг иқтидорли ёш ўйинчиларидан бири бўлган. Хусусан, Англия U-20 терма жамоаси сафида тўртта учрашувда майдонга тушган.

Шунга қарамай, бир неча позицияда ўйнай оладиган ярим ҳимоячи профессионал фаолияти давомида юқори чўққига кўтарила олмади ва омадини қуйи лига жамоаларида синаб кўришга мажбур бўляпти.

Каннаваро ҳайратга соляпти! Ўзбекистоннинг янги бош мураббийига Европадан қандай муносабат бўлди?

Ҳусанов ўрнига жаҳон чемпиони келади!

Ўзбекистонда мундиални “ёндирадиган” учта футболчи бор!

Испанияда ўйнаган юлдуз Ўзбекистонни қабул қилаётган Каннаварога ўзгача мурожаат қилди