Месси келажаги бўйича бир қарор келди

Жорий мавсумда Испания чемпионатида учинчи ўринни эгаллаган “Барселона” етакчиси Лионель Месси келажаги борасида бир қарорга келди. Аргентиналик ҳужумчининг шартномаси якунланаётгани боис унинг Каталониядаги фаолияти мухлислар эътиборида турган масала эди.

Журналист Николо Скира тарқатаётган хабарларга қараганда, 33 ёшли футболчи “Барселона” билан ўзаро ҳамкорликни яна икки йилга узайтиришга қарор қилган.

Аввалроқ, Месси фаолиятини қаерда давом эттириш масаласида оила аъзолари билан маслаҳатлашган, улар футболчини ПСЖга кўчиб ўтишини истаётгани ҳақида маълумотлар тарқатилганди. ПСЖ спорт директори Леонардо ҳам Месси атрофидаги вазиятни синчковлик билан кузатиб бормоқда.

Агар Месси Каталония клубида қоладиган бўлса, маоши кесилиши ҳақиқатга яқинроқ. Чунки “Барса” айни пайтда молиявий инқирозга юз тутган ва вазиятдан чиқиш учун бир неча маротаба ўйинчилар маошини кесишга мажбур бўлганди.

Месси яна икки йил юқори савияда тўп тепганидан кейин АҚШ чемпионатига йўл олишни мақсад қилгани айтилмоқда.