Мбаппе: "Атлетик"га қарши баҳс менга қаттиқ таъсир ўтказди"

Ла Лиганинг 18-туридан ўрин олган баҳсда "Реал Мадрид" "Севилья" устидан 4:2 ҳисобида ғалаба қозонди. Учрашувда Килиан Мбаппе 1 та гол ва 1 та голли узатмага муаллифлик қилиб, ўйиннинг энг яхши футболчиси бўлди. Мазкур тўқнашувдан сўнг франциялик ҳужумчи унинг Мадриддаги фаолияти ҳақида гапириб ўтди. 
 
"Тўғри, мавсум аввалида бироз мослашишга қийналдим. Бироқ, Винисиус, Беллингем, Родриго ва бошқа жамоадошларим менга катта ёрдам беришди. "Ливерпуль" ва "Атлетик Бильбао"га қарши баҳсларда пеналтидан фойдалана олмаганим жуда катта таъсир ўтказди. Мен ушбу вазиятдан сўнг тушкунликнинг энг тубига тушдим ва бу ҳолатни ўзгартириш учун бор нарсамни беришим кераклигини англаб етдим. 
 
Ҳозирги кунда мен яхши формадаман ва голлар урмоқдаман. 2025 йилда ҳам "қироллик клуби" оиласи учун бор кучимни бериб, барча совринларга эга чиқмоқчиман" - деди "қаймоқранглилар" ҳужумчиси. 
 
Эслатиб ўтамиз, 26 ёшли ўйинчи бу мавсум 24 та ўйинда иштирок этиб, 14 та гол ва 4 та ассистни ўз ҳисобига ёздириб қўйди.