"Манчестер Сити" ёш ярим ҳимоячи трансферини эълон қилди

"Манчестер Сити" ўзининг расмий сайтида янги трансфер ҳақида эълон қилди. Жамоа таркибини ярим ҳимоячи Сверре Нюпан тўлдирди. 18 ёшли норвегиялик "шаҳарликлар" сафига "Русенборг"дан кўчиб ўтган. Нюпан Англия Премьер-лигасининг топ-клуби билан 5 йиллик меҳнат шартномасини имзолади.

Сверре Нюпан Норвегиянинг ёшлар ва ўсмирлар терма жамоаларида кўплаб ўйинларни ўтказган. Нуфузли "Трансфермаркт" портали футболчини 15 миллион еврога баҳоламоқда.

Янги Англия чемпионати бошланишига бир ойча вақт қолди. "Манчестер Сити" 1-турда "Вулверҳемптон" меҳмони бўлади. Ўйин 16 август куни бўлиб ўтади.