“Ливерпуль”дан “Реал”га фақат бир футболчи керак, қолганларига иш йўқ!

“Реал” клуби “Ливерпуль”нинг тажрибали марказий ҳимоячиси Виржил ван Дейкка қизиқиш билдираётгани ҳақида хабарлар тарқалди.

Бу масалага нуфузли манба – Marca нашри аниқлик киритди. Унга кўра, “Қироллик клуби” 33 ёшли нидерландиялик футболчини трансфер қилмайди. Мадридликларга бошқа типдаги ўйинчи, яъни ҳимоядаги муаммоларни узоқ муддатга ёпадиган ҳимоячи керак.

Маълумотларга қараганда, Трент Александер-Арнольд “Реал” қизиқиш билдираётган “Ливерпуль”нинг ягона футболчиси ҳисобланади.

Айни пайтда томонлар ўртасида бу трансфер бўйича музокара кетмоқда.

Таъкидлаш жоизки, Трент ҳам Виржил ҳам мавсум охирида эркин агентга айланади. “Ливерпуль” ҳар икки футболчи билан ҳамкорликни узайтиришга ҳаракат қилаётган бўлса-да, ҳали томонлар бир қарорга келгани йўқ.