Клубини еврокубокга олиб чиққан мураббий истеъфога чиқарилади

Нуну Эшпириту Санту "Ноттингем Форест" бош мураббийлигидан истеъфога чиқарилди. 51 ёшли мутахассиснинг истеъфосини Record, Sky Sports, Девид Орнштейн ва бошқа нуфузли манбалар тасдиқламоқда.

Тез орада португалияликнинг истеъфоси расман эълон қилинади.

Ўтган ойда Нуну клуб хўжайини Эвангелос Маринакис билан муносабатлари бузилганини тан олганди.

Бу гаплар мураббийни ишдан бўшатишни режалаштирмаган Маринакисни ҳайрон қолдирди. Нунунинг баёнотларидан сўнг, клубнинг баъзи вакиллари унинг ишга содиқлигига шубҳа қилишди.

"Ноттингем Форест"ни "Тоттенхэм" собиқ устози Анже Постекоглу бошқариши мумкин, дея таъкидламоқда журналист Бен Жейкобс. Шунингдек, лавозимга Доменико Тедеско даъвогарлик қилмоқда.

Нуну 2023 йилнинг декабрида "Форест"ни қабул қилди. Унинг қўл остида жамоа 2024/25-йилги мавсум якунларига кўра АПЛда еттинчи ўринни эгаллади ва Европа Лигасига йўл олди.

Жорий мавсумда "Ноттингем Форест" Премьер-лиганинг учта ўйинида 4 очко жамғариб, турнир жадвалида 10-ўринда бормоқда.