Клоппнинг собиқ жамоадоши: "Юрген "Реал"ни бошқаришни орзу қилганини айтган"

"Майнц" жамоасида Юрген Клопп билан бирга тўп сурган Мирослав Таньга немис мутахассисининг келажакдаги режалари ҳақида гапирди. 

Таньганинг сўзларига кўра, Клопп "Ливерпуль"ни тарк этаётган пайтда унга икки орзуси борлигини айтган — Германия терма жамоаси ва "Реал Мадрид"ни бошқариш.

– У "Ливерпуль"дан кетар экан, менга шундай деганди: "Менинг икки орзум бор — Германия терма жамоасини ва "Реал"ни бошқариш". Улар амалга ошадими-йўқми, билмайман. Ҳар ҳолда, у "Реал" бош мураббийлиги учун номзодлардан бири. Аммо бу ҳозирча фақат тахмин, – деди Таньга.

Унинг таъкидлашича, Клопп Англиянинг бошқа бирор клубини бошқаришни ҳеч қачон хоҳламаган, шунингдек, Италия ёки Франция чемпионатларига қизиқмайди.

– У ҳеч қачон ўзини бошқа бирор англиялик клубда кўрмаган. Серия А ва Францияга ҳам қизиқиши йўқ. Бир куни у Германия терма жамоасига бош мураббий бўлади, деб ўйлайман.

Ҳозирда Мирослав Таньга Сербиянинг «Войводина» клубида фаолият олиб бормоқда ва Клопп билан яқинда алоқа қилганини таъкидлади:

– Биз у билан гаплашдик. Ҳозирда у "Ред Булл" тизимида ишлаяпти ва бутун дунё бўйлаб уларнинг клублари билан ҳамкорлик қилмоқда. У ҳозирча мураббийликни қайта бошлаш ҳақида ўйламаяпти. Қачондир зерикиб, скамейкага қайтадими-йўқми, у ҳам билмайди, – деди у.