Клоппни мураббийликка қайтарадиган клуб чиқди

Саудия Арабистонининг “Ал-Иттиҳод” клуби мураббийлик фаолиятида танаффус эълон қилган германиялик мутахассис Юрген Клоппни жамоа бошқарувига олиб келмоқчи.

Бу ҳақда TEAMtalk нашри журналисти Руди Галетти хабар тарқатди.

Маълумки, “Ал-Иттиҳод” ички чемпионатда Криштиану Роналду етакчилигидаги “Ан-Наср”га 0:2 ҳисобида ютқазиб қўйганидан кейин франциялик бош мураббий Лоран Блан истеъфога чиқарилган эди.

Юрген Клопп 2015-2024 йиллар давомида “Ливерпуль”ни муваффақиятли бошқариб, жамоаси билан Европа Чемпионлар лигаси ва Англия Премьер-лигаси ғолибига айлантирган эди.

Бироқ тажрибали мутахассис 2024 йилнинг ёзида бош мураббийликдан чарчаганини маълум қилиб, жамоани тарк этди. Унинг ўрнига келган Арне Слот дебют мавсумидаёқ “Ливерпуль” билан Англия Премьер-лигасида ғолиб чиқди.

Энди Саудия Арабистонининг энг қудратли клубларидан ҳисобланган “Ал-Иттиҳод” бир йил бош мураббийликдан четда юрган Клоппни жамоага олиб келмоқчи.