Katanetsga ishonish qanchalik to‘g‘ri? Bunday odamlar yakunda mukammal darajada o‘z niyatiga erishadi yoki katta muvaffaqiyatsizlikka uchraydi

Bugun bosh murabbiy Srechko Katanets bilan matbuot anjumani bo‘lib o‘tdi. Juda qiziq fikrlarni bildirib o‘tdi "kouch". Raqobat bo‘lishi kerak emasligi, Iskanderovning uslubi Kamerunga qarshi to‘g‘ri kelmasligi borasida g‘alati gaplar yangradi men uchun. Shomurodov to‘g‘risidagi gaplarga o‘rganib qoldik, mayli. U sardor, u TOP-5 chempionatda o‘ynaydi (zaxirada ekani qiziq emas). O‘zi Katanets noodatiy qarorlar bo‘yicha ancha e’tiborni torta oldi. Shuningdek, o‘ta konservativ ekani ham turli shubhali fikrlarga sabab bo‘lmoqda.

Masalan, u Temurxo‘ja Abduholiqov haqidagi savolga "oldin futbolchi bilan ishlamagani, uning moslashishi ko‘p vaqt talab qilishi"ni aytib o‘tdi. Murabbiy selektsiya jarayonida kimgadir imkon bermasdan turib, uning darajasini qanday aniqlab olishi mumkin. Bu xuddi ishga olinayotgan yangi kadrdan "tajribang bormi?", - deb so‘ragandek holat emasmi?

Raqobat haqidagi joyiga. Katanets raqobatni emas, ishonchni ustun qo‘yishini aytib o‘tdi. O‘zi ishonch bildirgan, taniydigan va birga ishlagan futbolchilarni ma’qul ko‘rishini ma’lum qildi. Shu sabab u ko‘pchilikning salbiy munosabatiga sabab bo‘ldi. Avvaldan u tavakkalchi odam emasligi, o‘ta ehtiyotkorligini bildirib qo‘ygandi. Odatda, bunday odamlar yakunda mukammal darajada o‘z niyatiga erishadi yoki o‘ta katta muvaffaqiyatsizlikka uchraydi. Biz birinchi variant bo‘lishi tarafdorimiz, albatta. Ammo ikkinchisi bo‘lsa, Katanets yana "men o‘z ishimni qildim", - deya olarmikin?

Iskanderov borasida u o‘yin uslubi to‘g‘ri kelmasligi, jismoniy tomondan ham afrikalik futbolchilar uni "eb qo‘yishi" haqida gapirdi. Bir tomondan to‘g‘ri fikrlar. Ammo viza haqida gapirib, Srechko imkon bo‘lsa, Jamshidni chaqirishini ham rad etmadi. Bu borada u qaror qilmagan. Mutaxassis shunga majbur bo‘lgan, katta ehtimol.

Oston O‘runov va Shahboz Umarov to‘g‘risida.  Bu ikki futbolchi o‘yin amaliyoti borasida "dahshatli" ko‘rsatkichlarga ega. Biri transfer mashmashasi sabab endi yangi jamoaga ko‘chib o‘tgan bo‘lsa, ikkinchisi zaxiradan o‘yinni kuchaytirishda qo‘l kelishi mumkin. Boshqachasiga tasavvur qilib bo‘lmadi. Murabbiy ikki yarim himoyachini istiqboli porloq ekaniga ishonadi. Buni oldin ham aytib o‘tgandi. Unga ishonch bildirilishi va yigitlar buni oqlashiga Srechko hozircha shubha qilmayapti. Ko‘ramiz, vaziyat qanday tus olarkin?!

Yoshlar futboli borasida mutaxassis noto‘g‘ri fikr bildirmagan, deb o‘ylayman. Bu o‘zbek futbolining og‘riqli nuqtalaridan biri bo‘lib kelgan. Ular natija qayd etadi, to‘g‘ri. Ammo shundan so‘ng darhol "ko‘zdan g‘oyib bo‘ladi". Katanets shu narsalardan xabardor ekani e’tiborga molik.

Shohrux Zoirov maqolasi.