Ivan Solovyov: “Navbahor” bilan amalda shartnomam bor. Qolishim yoki ketishimni rahbariyat hal qiladi

Kuni kecha Andrey Kanchelskis “Navbahor” bosh murabbiyligidan ozod etildi. Tabiiyki, muxlislar orasida ham murabbiy jamoani tark etgach u olib kelgan legionerlar masalasida turli hil mish-mishlar avj oldi.

"Navbahor" jamoasi muxlislarining telegramdagi rasmiy sahifasi shu kabi mish-mishlarga oydinlik kiritish maqsadida rossiyalik hujumkor yarim himoyachi Ivan Solovyov bilan bog‘landi hamda ayrim savollarga javob oldi.

– “Navbahor” bilan hozircha amalda shartnomam bor. Shartnomam yakunlangach jamoada qolamanmi yo‘qmi buni klub rahbariyati hal qiladi. Shahsan o‘zimni ketish niyatim yo‘q. Lekin hammasi rahbariyatning qarori va yangi murabbiyga bog‘liq. Agarda yangi bosh murabbiy jamoaga meni yordam berishda davom etishimni va Namanganda qolishimni xohlasa qoldiradi. Agarda aksi bo‘lsa bu uning qarori. Bunga xurmat bilan qarashimiz lozim albatta. Bu futbol. Futbolchining hayoti esa shunday. Men buni to‘g‘ri qabul qilaman. Yaqin kunlarda aynan shu masala yuzasidan klub rahbariyati bilan uchrashaman. Yakuniy qarorni keyin qabul qilaman”.

– “Jamoadagi muhit haqida gapiradigan bo‘lsam, futbolchilar bilan aloqalarimiz a’lo darajada. Hammamiz bir oiladekmiz. Kelgusi uchrashuvlarda ham kechagidek g‘alaba qozonib muxlislarni xursand qilishga harakat qilamiz”.

– “Andrey Kanchelskis haqida fikrim? Kanchelskisni hammamiz xurmat qilamiz. Meni bu jamoaga aynan ushbu murabbiy olib keldi. Uning taklifi bilan “Navbahor”ga keldim. U bilan qisqa vaqt ishlagan bo‘lsamda murabbiy yomon ishlamadi. To‘g‘ri, natijalar biroz pasayib, duranglar ko‘payib ketdi. Lekin bu futbol. Futbolda g‘alaba va mag‘lubiyat hamisha yonma-yon yuradi. Natijalarga kelsak aksari o‘yinlarda omad ham bizdan yuz o‘girganligini unutmaslik lozim. Murabbbiy haqidagi fikrlarim esa faqat ijobiy bo‘ldi. Uni xurmat qilaman va sobiq bosh murabbiyimizning kelgusi faoliyatiga omad tilayman” - deydi Ivan Solovyov.