"Истанбул Башакшеҳир" Аббосбек Файзуллаев трансферини расман эълон қилди

Туркиянинг "Истанбул Башакшеҳир" клуби Ўзбекистон Миллий терма жамоаси аъзоси Аббосбек Файзуллаев билан шартнома имзолаганини эълон қилди.

Клуб ва футболчи ўртасидаги битим беш йилга мўлжалланган. ОАВ аввалроқ траснфер суммаси 7,5 миллион еврони ташкил этгани ҳақида хабар берган эди.

"Ассалому алайкум Аббосбек Файзуллаев! Клубимиз бунгача ЦСКАда тўп сурган Ўзбекистон терма жамоаси футболчиси билан 5 йиллик шартнома имзолади.

Файзуллаевни оиламизда қутлаймиз ва унга оловранг-кўк либосда муваффақият тилаймиз", - дейилади "Истанбул Башакшеҳир" матбуот хизмати хабарида.

Файзуллаев 2023 йил августидан буён ЦСКАда ўйнаб келаётганди, у "Пахтакор"дан 500 минг евро эвазига ўтганди.  21 ёшли Аббосбек Москва клуби сафида жами 72 та ўйин ўтказиб, 8 та гол урган ва 22 та голли узатмани амалга оширган.

ЦСКА билан биргаликда Файзуллаев Россия кубоги ва Суперкубоги ҳамда РПЛнинг бронза медалини қўлга киритди. Эслатиб ўтамиз, Файзуллаев 2023 йил Осиёда йилнинг энг яхши ёш футболчиси деб топилган.