“Интер” дарвозабони машинада ногирон одамни босиб кетди

Италиянинг “Интер” жамоаси иккинчи дарвозабони Хосеп Мартинес айни пайтда бошидан шок ҳолатини ўтказмоқда.

 la Gazzetta dello Sport нашрининг ёзишича, испаниялик Мартинес Комо вилоятидаги аҳоли пунктларидан бири ногиронлар аравасида бўлган фуқаро билан авария ҳолатини содир этган. Тез ёрдам ва футболчининг ўзи ёрдам кўрсатганига қарамай, 81 ёшли эркак воқеа жойида вафот этди.

Маълумотларга қараганда, ногиронлар аравасида ҳаракатланаётган ёши катта кишининг саломатлиги ёмонлашган ва йўналишини бирдан ўзгартириши оқибатида Хосеп Мартинес бошқарувидаги машинанинг йўлига чиқиб кетган.

Айни пайтда полиция автоҳалокат сабаби ва айбдорларини аниқлаш бўйича суриштирув ўтказяпти.

27 ёшли Хосеп Мартинес аслида “Барселона” клуби тарбияланувчиси ҳисобланади. Профессионал фаолиятини “Лас-Пальмас”да бошлаган. Кейинчалик Германиянинг  “Лейпциг” ва Италиянинг “Женоа” клубларида ўйнаган.

“Интер” маҳоратли дарвозабонни 2024 йили асосий голкипер Ян Зоммерга ўринбосар сифатида 14 миллион евро эвазига ўз сафига қўшиб олган эди.