Ibragimovich 3 yilga futboldan chetlatilishi mumkin!?

"Milan" klubi va Shvetsiya terma jamoasi hujumchisi Zlatan Ibragimovich futbol bilan bog‘liq har qanday faoliyat turidan uzoq vaqtga chetlatilishi mumkin. Bunga FIFA va UEFA tomonidan belgilangan qoidalarning qo‘pol ravishda buzilgani sabab. 

Gap shundaki, 39 yoshli shved 2018 yildan beri Bethard bukmekerlik idorasining 10 foiz ulushiga ega. U to‘liq o‘ziga tegishli bo‘lgan Unknown AB firmasi orqali Bethard bukmekerlik kompaniyasiga bo‘lgan huquqlarga egalik qiladi.

FIFA va UEFA qoidalariga ko‘ra, agar futbolchilar bukmekerlik idoralarida qiziqishlari bo‘lsa, ularning sha’feligida o‘tkaziladigan musobaqalarda ishtirok eta olmaydi. Zlatan esa, "Milan" safida Evropa ligasida o‘ynagan va Shvetsiya terma jamoasi safida “JCh-2022” saralash bahslarida maydonga tushdi hamda ushbu qoidani buzdi.

O‘z navbatida, Bethard bukmekerlik idorasi Ibragimovich hali ham kompaniyaning ulushiga egalik qilishini tasdiqladi.

Aytish lozimki, qoidalarning tegishli bandini buzganligi uchun futbolchi 100 ming evrogacha jarimaga tortiladi va 3 yilgacha futbol bilan bog‘liq har qanday faoliyatdan chetlashtiriladi.

Eng yomoni, Bethard Ibragimovich ishtirok etgan Shvetsiya terma jamoasining Gruziya va Kosovoga qarshi o‘yinlariga garovlar taklif qildi. Bundan tashqari, ushbu bukmekerlik kompaniyasi muntazam ravishda A Seriya o‘yinlariga ham garovlar taklif qiladi.

Qayd etish kerakki, Shvetsiya futbol federatsiyasi bu haqda bir necha yillardan beri biladi.

Hozircha FIFA va UEFA vaziyatga izoh berishdan bosh tortmoqda.

Zlatan Ibragimovich “Malmyo” klubi tarbiyalanuvchisi hisoblanadi. U o‘zining ilk professional shartnomasini ham aynan mana shu jamoa bilan tuzgan. U faoliyati davomida “Ayaks”, “Yuventus”, “Inter”, “Barselona”, “Milan”, PSJ, “Manchester Yunayted”, “Los-Anjelas Gelaksi” kabi klublarda to‘p surgan.

Ibragimovich Shvetsiya terma jamoasida 2001 yildan buyon to‘p surib kelmoqda. U 2016 yilda terma jamoadagi faoliyatini yakunlagani haqida e’lon qildi. Ammo 2021 yilga kelib, u yana terma jamoaga qaytdi. Zlatan Shvetsiya termasida jami 118 ta o‘yinda maydonga tushgan va ushbu o‘yinlarda o‘z hisobiga 62 ta gol yozdirib qo‘ygan.

Umid qilamizki, yana bir necha yillar ushbu afsonaviy futbolchini yashil maydondagi fantastik harakatlarining guvohi bo‘lamiz.