Ҳусановнинг жамоаси "Реал" билан катта ишга қўл урмоқда
Ўзбекистон миллий терма жамоаси марказий ҳимоячиси Абдуқодир Ҳусанов Англия Премьер-лигаси иштирокчиси “Манчестер Сити” футболчиси эканини инобатга олиб, sports.uz портали ушбу клуб лагерига тегишли янгиликларни ўзбекистонлик футбол ишқибозлари эътиборига ҳақола қилишда давом этади.
“Манчестер Сити” раҳбарияти таркибни янгилаш сиёсатини ёзги трансферлар даврида ҳам давом эттиради. Бош мураббий Хосеп Гвардиола жамоага ёш, курашувчан ва шу билан бирга кучли ўйин кўрсата оладиган янги ижрочиларни олиб келишга қарор қилган.
“Шаҳарликлар” анчадан бери “Реал”нинг универсал ҳужумчиси Родригога кўз тикиб келади. Ниҳоят, клуб мутасаддилари жорий мавсум якунланиши билан бразилиялик юлдузни олиш ҳаракатларини бошлайди.
Defensa Central нашрининг маълум қилишича, “Манчестер Сити” Родриго Гоэс трансфери бўйича “Реал”га дастлабки расмий таклифни тайёрламоқда.
“Шаҳарликлар” дастлаб, мадридликларга муайян сумма таклиф қилиб кўради ва вазиятга қараб, “Қироллик клуби”нинг розилигини олиш учун бадал миқдорини оширмоқчи.
“Реал” ҳам кейинги икки мавсумда Жуд Беллингем ва Килиан Мбаппе келганидан кейин иккинчи планга ўтиб қолган Родригони сотиб юборишга қарши эмас. Трансфер амалга ошиши учун манчестерликлар ҳужумчининг розилигини олиши керак.
Бразилиялик ҳужумчи ўзига жамоадаги асосий ролларни берадиган клуб билан ҳамкорлик ўрнатишга қарши эмаслигини билдирган. Бироқ унгача 24 ёшли футболчи “Реал”га янги тайинланадиган мураббий билан келажаги ва ўйин амалиётини кафолатлаш бўйича гаплашиб олмоқчи.
Ҳусановнинг машҳур рақобатчиси кетади
“Манчестер Сити” мутасаддилари ёши ўтиб қолаётган футболчилар билан хайрлаш сиёсатини тўхтатмоқчи эмас. Хусусан, қишки трансферлар вақтда мутасаддилари жамоа сардори Кайл Уокерни “Милан”га ўтказиб юборди.
Жамоанинг 33 ёшли юлдузи Кевин де Брюйне ҳам юқори савияда ўйнаётганига қарамай, бош мураббий Хосеп Гвардиола бельгиялик плеймейкернинг клубдан кетишини айтган.
TBR Football нашрининг ёзишича, тажрибали марказий ҳимоячи Жон Стоунз ҳам “шаҳарликлар” сафидан чиқиш эҳтимоли ортиб бормоқда.
Англиялик футболчини аввалги клуби – “Эвертон” ёрдамга чақирмоқда. “Манчестер Сити” эса. 30 ёшли ўйинчининг кетишига йўл очиб беришга тайёр.
Стоунз Манчестерга келгунига қадар, 2013-2016 йиллар давомида айнан “Эвертон”да тўп тепган ва бу жамоадаги ишончли ўйинлари билан манчестерликлар назарига тушган.
“Эвертон”дан ташқари Англия Премьер-лигасининг яна бир неча клублари тажрибали ўйинчи билан ҳамкорлик ўрнатишга тайёр. Ўз навбатида, “Манчестер Сити” январда ҳимоя марказига Абдуқодир Ҳусанов ва Витор Рейс каби ёш ўйинчиларни олди. Шунингдек, айни пайтда ижара асосида “Ланс”да ўйнаётган Жума Ба ҳам келаси мавсум олдидан Манчестерга қайтади ва ҳимоя марказидан жой олиш учун рақобатга киришади.
Жон Стоунзнинг “Манчестер Сити” билана яна бир йиллик шартномаси бор. Transfermarkt портали экспертлари бу ҳимоячини 30 миллион еврога баҳоламоқда.
Фикрлар