Ҳеч қайсинг керак эмассан: “Арсенал” 20 та футболчи билан хайрлашди!

Англия Премьер-лигасида яна чемпионлик унвонини қўлга кирита олмаган “Арсенал” клубнинг деярли барча жамоалари таркибида катта тозалаш ўтказяпти.

Хусусан, клуб асосий жамоадан тортиб, ёшлар ва қизлар таркибида ўйнаётган жами 20 нафар футболчи билан хайрлашганини эълон қилди.

Испаниялик мутахассис Микель Артета устозлик қилаётган биринчи жамоадан тўрт нафар машҳур футболчи кетди. “Канонирлар” ҳимоячи Киран Тирни, ярим ҳимоячи Жоржиньо, дарвозабон Нето ва ҳужумкор футболчи Раҳим Стерлингга жавоб бериб юборди.

Таъкидлаш жоизки, Нето ва Стерлинг мавсум бошида бошқа клублардан ижарага олинган эди. Уларнинг маҳорати Микель Артетани қониқтиргани йўқ. Бу ўйинчилар ўзлари келган “Борнмут” ва “Челси”га кетди.

Яна бир номдор футболчи Томас Партининг ҳам келажаги мавҳум бўлиб турибди.   Ганалик ярим ҳимоячининг шартномаси бир неча кундан кейин тугайди. Айни пайтда томонлар янги келишув бўйича музокара ўтказяпти.