Гвардиола АПЛдаги чемпионлик учун кураш ҳақида фикр билдирди

Англия Премьер-лигасининг 8-туридан сўнг Микель Артета бошчилигидаги "Арсенал" 19 очко жамғарган ҳолда, етакчилик қилмоқда. "Манчестер Сити" бош мураббийи Хосеп Гвардиола эса чемпионлик учун кураш ҳақида ўз фикрлари билан ўртоқлашди.

"Икки ёки учта учрашувдан кейин "Манчестер Сити" чемпионлик учун курашдан чиқиб кетди, деб ўйлашганди. Энди эса "Ливерпуль" чиқиб кетди, дейишяпти. Лекин мен айта оламан – улар яна қайтишади.

Мутахассислар, экспертлар, собиқ футболчилар – улар бешта ўйиндан кейин нима бўлишини билади, деб ўйлашади. Мен эса бундай қила олмайман. Ҳар доим 10–15 та ўйин ўтгандан кейингина ҳақиқий вазиятни англайман.

Аммо ўйлайманки, шубҳасиз, "Ливерпуль" ҳам, "Арсенал" ҳам чемпионлик учун курашда бўлишади. Яна бошқалар ҳам қўшилиши мумкин. Умид қиламанки, биз ҳам улар орасида бўламиз", – деди испаниялик мутахассис "Астон Вилла"га қарши учрашувдан аввалги матбуот анжуманида.