Флик қайси позицияга футболчи олиб келмаслигини айтди

"Барселона" бош мураббийи Ханс-Дитер Флик Каталония клуби ярим ҳимоя чизиғини янги футболчилар билан кучайтирмоқчи эмаслигини маълум қилди.

 "Барселона" яримҳимоя чизиғи ҳаддан ташқари юкланган. Агар бизга янги футболчи келса, у ярим ҳимоячи бўлмаслиги аниқ", - дея Фликнинг сўзларини келтирди Mundo Deportivo.

Флик 2024 йилнинг май ойидан буён "Барселона" бош мураббийи лавозимида ишлаб келмоқда. Ўтган мавсумда унинг жамоаси Ла Лига чемпионлиги, Испания кубоги ва Испания Суперкубогини қўлга киритди. Шунингдек, "кўк-анорранглилар" Чемпионлар лигаси ярим финалига қадар етиб борган ва у ерда Миланнинг "Интер" клубига имкониятни бой берган эди. Амалдаги шартномага кўра, германиялик мутахассис 2027 йилга қадар "Барселона"ни бошқаради.