ФИФА Роналдуни Саудиядан олиб кетмоқчи

ФИФА президенти Жанни Инфантино Саудия Арабистонидан ташқаридаги клубларни “Ан-Наср” ҳужумчиси Криштиану Роналдуни клублар ўртасидаги жаҳон чемпионатига жалб қилишга чақирди.

Бу ҳақда таниқли журналист Бен Жейкобс ўзининг ижтимоий тармоқдаги саҳифасида маълумот тарқатди.

Португалиялик юлдузнинг “Ан-Наср” билан шартномаси 30 июнь куни тугайди. Клуб унга ҳамкорликни узайтириш бўйича янги битим берган.

Ўз навбатида, Саудия Арабистонининг клублар ўртасидаги жаҳон чемпионатида иштирок этадиган клуби “Ал-Ҳилол” ҳам 40 ёшли тўпурарни ўз сафига қўшиб олишга ҳаракат қиляпти.

Шунингдек, ФИФА янги форматда ўтказаётган клублар ўртасидаги жаҳон чемпионатининг бир нечта иштирокчилар – “Реал”, “Челси”, “Монтеррей” каби турли мамлакатлар жамоалари ҳам ушбу турнирда қатнашишни орзу қилаётган Роналду билан қисқа муддатли шартнома тузишга тайёр экани ҳақида хабарлар тарқатилган эди.