Файзуллаев бу футболчилар орасида суперюлдузга айланади

Туркия Суперлигаси Европада энг жадал ривожланиб бораётган лигаларидан ҳисобланади. Турклар кейинги йилларда жаҳон футболида ном қозонган ўйинчилар ва мураббийларни тобора кўпроқ ўз жамоаларига жалб этиб келмоқда.

Бу жараёнда турк жамоаларида ўйнаётган ўзбек футболчилари сони ҳам ортиб бормоқда. Ўз даврида Отабек Шукуров “Фотиҳ Карагюмрюк” ва “Кайсериспор” жамоасида фаолият юритган бўлса, ўтган мавсум Азизбек Турғунбоев “Сивасспор”да, Ҳусниддин Алиқулов “Ризеспор”да ўйнади.

Бошланаётган мавсумда ўзбекистонлик футбол ишқибозлари Туркия чемпионатида “Истанбул Башакшеҳир”га мухлислик қиладиган бўляпти. Ўтган мавсумни бешинчи ўринда якунлаган жамоа яқинда ўз сафига Элдор Шомуродовни қўшиб олган эди.

30 ёшли ҳужумчимиз УЕФА Конференциялар лигаси иккинчи саралаш босқичида Болгариянинг “Черно Море” жамоасига қарши ўтказилган учрашувда майдонга тушиб, “Башакшеҳир”даги расмий дебютини ҳам нишонлаб олди.

Энди истанбулликлар жамоасини Аббосбек Файзуллаев кучайтирадиган бўляпти. Турк футболига ихтисослашган россиялик эксперт Эльвин Керимов “Башакшеҳир”нинг етакчи ўйинчилари ҳақида фикр билдирар экан, Файзуллаев ҳам улар орасида ўзини кўрсата олишини таъкидлади.

- Аббосбек Файзуллаев нафақат “Истанбул Башакшеҳир”нинг, балки бутун лиганинг юлдузи бўлишга қодир. Бу жамоа таркибида суперюлдузлар йўқ, лекин жамоа анча нуфузли. Эътиборга молик ўйинчилар орасида Уссейн Ба бор. Бу ҳимоячи узоқ вақт “Олимпиакос”да ўйнаган ва Еврокубокларда жуда бой тажриба тўплаган.

“Бешиктош”дан келган ва ўз даврида Туркия терма жамоасида тўп тепган Онур Булутнинг ҳам малакасига ҳеч қандай шубҳа йўқ.

Дениз Тюрюч ҳам Онер Булут сингари Туркиянинг гранд клубларидан “Фенербаҳче” ва миллий терма жамоада ўйнаш тажрибасига эга. Дениз стандарт вазиятлар устаси ҳисобланади. Унинг “Олд Траффорд”да жарима нуқтасидан “Манчестер Юнайтед” дарвозасига урган голини мухлису мутахассислар ҳамон яхши эслашади.

Таянч ярим ҳимоячиси Берат Ўздемир “Трабзонспор” билан Туркия чемпионлигига сазовор бўлган. Португалиялик легионер Мигель Крешпу ҳамюрти Жоржу Жезуш “Фенербаҳче”ни бошқарган пайтда жуда муҳим ўйинчи эди.

Истанбулликлар таркибида “Штутгарт” тарбияланувчиси Беркай Ўзжан, “Марсель”да вояга етган ва бир неча йил олдин Туркия Суперлигасини ларзага солган Юсуф Сари каби маҳорат эгалари ҳам тўп тепади.

Ҳужумчи Дейви Зелькенинг суяги Германия Бундеслигасида қотган. У ўз юртидаги фаолияти давомида “Вердер”, “Герта”, “Лейпциг”, “Кёльн” каби номдор клублар учун гол урган.

Муҳаммад Шенгезер – Туркия чемпионатида оёқда жнг яхши ўйнайдиган дарвозабон сифатида тилга олинади. Бу посбон Конференциялар лигасида иккита голли пас узатгани билан ҳам эътибор қозонган.

Бош мураббий Чағдаш Атан  учун ўйинчиларнинг бу сифатлари жуда муҳим ҳисобланади, - деди Эльвин Керимов.

Таъкидлаш жоизки, “Истанбул Башакшеҳир”нинг яна бир янги ҳужумчиси Элдор Шомуродов маҳорат ва тажриба бобида ҳам ҳеч кимдан қолишмайди. “Рома”дан кейинчалик тўлиқ трансфер қилиш ҳуқуқи билан ижарага олинган ўзбек легионери “Башакшеҳир” вакиллари орасида энг қимматбаҳо икки футболчидан бири ҳисобланади.

Transfermarkt портали Шомуродов ва ганалик Жером Опокуни 5 миллион еврога баҳолаган.

Қизиғи шундаки, Аббосбек Файзуллаев “Башакшеҳир”га қўшилиши билан истанбулликларнинг энг қиммат ўйинчисига айланади. Чунки 21 ёшли футболчимиз халқаро порталда трансфер суммаси  8 миллион евро экани кўрсатилган.

Ҳусановга жой борми? Гвардиола янги таркиб шакллантиряпти

Эксперт: Бу футболчи Ҳусановнинг йўлини тўсяпти

Файзуллаев фаолиятида ўзгариш

Файзуллаев Туркияда узоқ қолмайди