Эрнесто Вальверде "Манчестер Юнайтед"га қарши баҳсдан сўнг ҳакамлардан норози бўлди

Эрнесто Вальверде бошчилигидаги "Атлетик" Европа лигасининг ярим финал илк ўйинида Рубен Аморимнинг "Манчестер Юнайтед"и билан куч синашиб, йирик 3:0 ҳисобида мағлуб бўлди. Ушбу беллашувдан сўнг жамоа бош мураббийи ҳакамларга норозилик билдирди.

Биринчи таймда ҳакам Эспен Эскос МЮнинг фойдасига пенальти белгилади — Дани Вивиан қанотдан келган узатмадан сўнг Расмус Хойлундни жарима майдонида ушлаб қолди. Вивиан учун бу ҳаракат қизил карточка билан жазоланди.

Бу вазиятдан бир неча сония олдин "Юнайтед"нинг вингери Алехандро Гарначо ҳужум пайтида йиқилди ва тўп, эҳтимол, қўлига тегди.

Вальверде шундай деди:

"Пенальти ва четлатиш ўйинга жуда катта таъсир қилди. Унгача биз устунлик қилаётгандик, гол урмаган бўлсак-да, имкониятлар яратдик.

Гарначонинг пенальтидан олдин қўли билан ўйнагани бўйича эътироз билдирдик... Менимча, бу эпизод аниқроқ эди.

Биз учун жуда қаттиқ жазо бўлди — 0:2 ва бутун ўйинни бир киши кам ўйнадик, устига-устак Вивиансиз."

Магуайрнинг Мароан Саннадни ушлаб қолиши ҳақида:

"Мендан сўрасангиз – бу қизил карточка, лекин аниқ билмайман. Биз учун бу фол эди, лекин қизил карточками ёки йўқлигини айта олмайман" - дея ўз фикрлари билан ўртоқлашди испаниялик мутахассис.