Энди бор умид Шомуродовдан! “Башакшеҳир”да катта йўқотиш
Туркия чемпионатининг 15-турида Ўзбекистон миллий терма жамоаси етакчилари Аббосбек Файзуллаев ва Элдор Шомуродов ўйнаётган “Истанбул Башакшеҳир” клуби Суперлиганинг энг қудратли жамоаларидан “Фенербаҳче”ни қабул қилади.
Нури Шахин шогирдлари ҳозиргача 14 та учрашувда тўрттадан ғалаба ва дуранг қайд этиб, 16 очко тўплаган ҳолда мусобақа жадвалининг тўққизинчи поғонасида жойлашган. Истанбулликлар ўз майдонидаги 6 та ўйинда фақат бир марта ғалаба қозонган холос. 11-турда Элдор Шомуродовнинг ягона голи “Башакшеҳир”га “Коньяспор” устидан кичик ҳисобда ғалаба келтирган.
Умуман олганда, 30 ёшли ўзбек ҳужумчисининг жамоага таъсири ўта кучли. “Истанбул Башакшеҳир” чемпионатда урган жами 19 та голнинг ярмидан кўпи, яъни 10 таси Шомуродов ҳиссасига тўғри келади.
Бу галги рақиб чемпионатнинг иккинчи поғонасида бораётган “Фенербаҳче” Суперлигада ҳали мағлубиятга учрамаган ягона жамоа бўлиб турибди. Европада танилган бир қатор юлдузларни жамлаган бу жамоа тўққизта ғалаба ва бешта дуранг билан 32 очко жамғарди. Фенербаҳче” жорий мавсум лигада энг кўп – 31 та гол урган жамоа ҳисобланади.
“Истанбул Башакшеҳир” ва “Фенербаҳче” ҳозирга қадар жами 34 марта тўқнаш келган. Шулардан 20 тасида “Фенербаҳче”нинг қўли баланд келган. “Башакшеҳир” 11 та учрашувда ғалаба қозонган ва учта баҳсда кучлар тенг келган.
“Башакшеҳир”нинг ўзаро учрашувлардаги охирги муваффақияти 2022 йилнинг 5 февралига тўғри келади. Шундан бери рақиб жамоа кетма-кет олтита баҳсда ҳар томонлама устунлик қилган.
Бўлажак тўқнашув олдидан “Истанбул Башакшеҳир”да кадрлар муаммоси юзага келди. Нури Шахин асосий таркиб ўйинчиларидан уч нафари хизматидан фойдалана олмайди. Юсуф Сари жароҳат туфайли майдонга тушолмайди. Тажрибали легионерлардан Жером Опоку ва Деви Зельке дисквалификацияга учраган.
“Фенербаҳче”дек қудратли рақибга қарши курашда “Башакшеҳир” ўзбек футболчиларига суянишига тўғри келмоқда. Элдор Шомуродов мавсум бошидан бери жамоани ўз ортидан етаклаб келаётган бўлса, жароҳатини даволатиб тўлиқ куч билан ўйнай бошлаган Аббосбек Файзуллаев энди унинг ёнига кирди.
Мезбон жамоа бош мураббийи Нури Шахин “Фенербаҳче”га қарши учрашувда ҳар икки ҳамюртимизга ишончи юқорилигини таъкидлади.
- Биз Файзуллаевнинг даражасини биламиз. Шу боис, у “Башакшеҳир”да ўйнаяпти. Булар биз учун қадри баланд футболчилар. Файзуллаев тез орада юқори спорт формасига чиқади.
“Фенербаҳче”га қарши учрашувда пухта тайёрланяпмиз. Бунақа мураккаб учрашувларни ёқтирамиз. Учрашувда Опоку ва Зельке қатнаша олмаса ҳам, бизда Нуну да Кошта, Бертуг Ўзгюр ва асосийси Элдор Шомуродов бор, - деди Нури Шахин.
Суперлига тўпурарлари пойгасида ўнта гол билан иккинчи ўринда бораётган Элдор Шомуродов ўзига қарши ўйнаган 14 та жамоадан тўққизтасининг дарвозасини ишғол қилди. Улар орасида “Бешиктош”, “Галатасарой”, “Трабзонспор” каби ўта кучли таркибга эга рақиблар ҳам бор. Энди Суперлига кашфиётига айланиб улгурган Элдор “Фенербаҳче”ни ҳам ўз “қурбонлари” қаторига қўшиб қўйишига умид қиламиз.
Туркия чемпионатининг 15-туридан ўрин олган “Истанбул Башакшеҳир” ва “Фенербаҳче” ўртасидаги учрашув 6 декабрь куни Тошкент вақти билан соат 22:00 да старт олади.
Шомуродов ва Файзуллаев мураббий истеъфосига “сабабчи” бўлди
Ҳусанов нечанчи ўринда? Жаҳон чемпионати иштирокчилари рейтинги эълон қилинди
Россияда Шомуродовни эслаб қолишди...
Бу хатодан кейин Гвардиола Ҳусановни асосий таркибга қайтариши шарт
Суперкомпьютер Ўзбекистоннинг “ЖЧ-2026”даги имкониятини қандай баҳолади?
Нури Шахин Шомуродов уни қандай ҳайратга солганини айтди
Аламли мағлубиятдан кейин Ҳусановнинг ўйини қандай баҳоланди?
Ўзбекистоннинг жаҳон чемпионатидаги ғалабасига қандай муносабат бўлди?
Фикрлар