Eldor Shomurodovning o‘yini nega qovushmagani va zaxiraga olinishining sababi haqida - Xayrulla Hamidov

Italiya chempionati 4-turida “Verona” - “Roma” bahsi o‘tkazildi. Bellashuvda Eldor Shomurodov ilk bor A Seriyada rimliklarning asosiy tarkibiga kiritildi. Biroq hamyurtimiz uchrashuvni to‘liq o‘tkazmadi va zaxiraga chiqarildi.

Qolaversa, hujumchimiz o‘z hisobiga samarali harakat yozdirib qo‘ya olmadi. “Roma” A Seriyada ilk bor mag‘lubiyatga uchradi.

Taniqli sharhlovchi Xayrulla Hamidov SPORTS.uz sayti tomonidan tashkil etilgan ko‘rsatuvda Eldor Shomurodovning nega o‘yini qovushmagani va zaxiraga olinishining sababi haqida gapirdi.

- Men avval ham “Verona”ni qiyin raqib, deb bilganman. Chunki Italiya chempionatini sharhlab yurganimda o‘yinlarini ko‘rganman. Jamoani boshqacha hurmat qilaman. “Verona”ning bir quroli bor. Agar u ishlab qolsa, mana man degan top klubni ham taslim etishi mumkin. Jamoaga hozir Igor Tudor murabbiylik qilmoqda. Avvalgi murabbiy ham kuchli edi. 

“Verona” pressingli, kombinatsion futbol o‘ynaydi. Shuning uchun “Roma” bilan bahs og‘ir o‘tishini taxmin qilgandim. O‘tgan yili barcha kuchli jamoalardan ochko olgan. Statistikada ham “Verona” ustunlik qilgan. Umuman olganda, haqli g‘alaba bo‘ldi.

- Shomurodovning o‘yini nega qovushmadi?

- Menimcha, Eldor qap qanotga qo‘yilgani uchun eng yaxshi o‘yinlaridan birini namoyish etmadi va o‘zgartirildi. Hamyurtimiz chap qanotdan chiqqan futbolchi. Ammo odam baribir sof hujumchiga o‘tganidan keyin butunlay rejim o‘zgaradi. Shunda yana eski holatga birdan qaytishi qiyin kechadi. Shomurodov o‘zgartirilishining asosiy sababi mezbonlar 44 foiz hujumni o‘ng tomondan tashkil qilganidir.

Italiya chempionati 4-tur ramziy terma jamoasi (Foto)

Shuning uchun u almashtirildi, deb o‘ylayman. Mourino ham buni ko‘rib, shunday qarorga kelgan. Bunga Shomurodov gol urmagani yoki pas bermagani sabab emas. U chap qanotdan ancha uzilib qopti. Ancha vaqt sof hujumchi pozitsiyasida to‘p tepdi. Agarda qanotda va sof hujumning o‘zida tez-tez o‘ynab yurganida bunday holat kuzatilmasdi, - dedi Xayrulla Hamidov.