Элдор Сакаев: "Мухлислар учун энг яхши совға - бу ғалаба"

«Андижон» жамоаси учун «Coca-cola» Суперлиганинг 5-тур доирасида «Насаф»га қарши кечган учрашуви чинакамига байрамона руҳда ўтди. Бунгача ҳали ғалаба нималигини билмай келаётган андижонликлар янгича қиёфа касб этган «Соғлом авлод» стадионидаги илк очилиш учрашувида ажойиб ғалабани қўлга киритиб, андижонлик мухлисларни қувонтиришди. Бунинг устига Андижон вилояти ҳокими Шуҳратбек Абдураҳмонов ҳам ўша куни футболчиларни ажойиб ғалаба билан табриклаб, мухлислар олдида муносиб равишда рағбатлантирди. Бир сўз билан айтганда, вилоят ҳокимининг футболга қаратаётган катта эътибори туфайли Андижонда мухлисларнинг яна олдингидек футболга бўлган қизиқиши ортиб бормоқда. «Насаф»га қарши ўйин ва ундаги қозонилган ғалаба эса андижонликларга чинакамига байрамона кайфият улашди. Жамоа бош мураббийи Элдор Сакаев эса илк ғалабадан сўнг жамоасининг шундай ғолибона руҳини сақлаб қола олиши даркор. Элдор Усмонович эса бир қатор масалаларда ўз фикрлари билан ўртоқлашди.

«Насаф» устидан қозонилган ғалаба барчамизни қувонтирди»

- Янгиланган аренада «Андижон» ишқибозларини ишончли ғалаба билан қувонтирганимиздан хурсандман. Андижон вилояти аҳлини ва клубни эришилган ютуқ билан самимий муборакбод қилмоқчиман. Албатта, «Насаф» - жуда кучли клуб. Жамоа таркибида яхши ижрочилар жамланишган. Уни эса яхши мутахассис бошқармоқда. Шундай рақиб устидан ғалаба қозониш кишини қувонтирмасдан қолмайди. Футбол шундай ўйинки, бироз диққатингни йўқотадиган бўлсанг, қийин аҳволга тушиб қоласан. Тўғри, ҳисобни биринчи бўлиб биз очдик. Аммо кўп ўтмай рақибларга ўртадаги тиклаш имконини бердик. Лекин ички имкониятларимиздан келиб чиққан ҳолда ва стадионга ташриф буюрган ишқибозларимиз далдаси билан ҳаммасини ўз изига солдик. Андижонда катта футбол байрами эди. Шунинг учун Андижон халқини ғалаба билан хурсанд этишимиз керак эди. Шу боис футболчиларда босим ҳам катта бўлди. Яна бир бор Андижон вилояти аҳлини эришилган ғалаба билан табриклайман. Ўз навбатида ўйиннинг қизиқарли кечишига сабабчи бўлган меҳмонларга ҳам миннатдорлик билдириб қоламан. Уларга келгуси учрашувларда омад ёр бўлишини истайман. Бевосита «Андижон»га тўхталадиган бўлсам, ўйинимизнинг бир қанча жиҳатларини яхшилаш устида ишлашимиз кераклигини кўрдим.

«Футболчиларим катта босимни кўтара олишди»

- Албатта, юқорида айтиб ўтганимдек, ўтказиб юборилган жавоб голидан кейин йигитлар маълум вақт фикрларини бир жойга жамлай олмасдан қолдилар. Ўйинимизнинг бир қанча жиҳатларини яхшилашга эхтиёж сезаётганимиз борасида шунга ҳам ишора қилиб ўтдим. Қолаверса, бугун Андижонда катта футбол байрами бўлгани туфайли жамоамиз аъзолари зиммасида улкан масъулият ҳисси ётганди. Ахир мухлислар клубнинг Суперлигадаги илк уй ўйинини орзиқиб кутгандилар. Бундай маҳалда улар учун энг яхши совға жамоа эришган ғалаба бўлади. Муҳими, йигитларимиз шуни ҳис қилган ҳолда тўп суришди ва якунда ғалабани қўлга киритдилар. Танаффус чоғида уларни етарли даражада руҳлантиришга ҳаракат қилдим. Ҳаяжонларини бироз босган ҳолда тўп суришлари кераклигини алоҳида таъкидладим. Кўрган бўлсангиз, йигитларимизда хавфли вазиятларни охирига етказишда бироз ишонч етишмади. Нима бўлган тақдирда ҳам футболчиларимиз катта босимни кўтара олишди ва жуда керакли бўлган ғалабани қўлга киритдилар. Бунинг учун улардан жуда миннатдорман.

«Доим ҳужумкор ўйин тарафдориман»

- Ҳамманинг ўз фикри бор. Лекин олдидан нима бўлишини ҳеч ким билмайди, фақат Худо билади. Доим натижа ўйиндан кейин билинади. Ҳар бир мураббийнинг ўйинни ташкил этиш борасида ўз фалсафаси ва ғоялари бўлади. Биз «Насаф»га қарши учрашувни ғалаба билан тамомлаш мақсадида ўтказдик. Албатта, бу гапимни бироз нотўғри тушунмаслигингизни сўраб қоламан. Ҳар бир мураббий каби мен ҳам ўйинларни иложи борича қониқарли натижа билан тамомлаш пайида бўламан. Лекин кўпинча вазиятдан келиб чиққан ҳолда қарор қабул қилишга тўғри келади. Қолаверса, ҳар бир футболчининг кучли ва кучсиз томонлари бор. Мураббий шогирдларидаги кучсиз жиҳатларини йўқотишга ҳаракат қилади. Ҳа, биз ҳисобни ушлаб қолиш учун ўйнадик. Бундан кейин ҳам яхши ўйин намойиш этишга ҳаракат қиламиз. Унутмаслик керакки, жамоа таркибида янги ўйинчилар кўпчиликни ташкил этади. Ўзаро чиқишиб кетиши учун эса вақт керак. Боз устига про-лига билан Суперлига ўртасидаги фарқ сезиларли даражада эканлигини унутмаслик даркор. Мен эса ҳужумкор ўйин тарафдориман ва жамоамдан ҳам шуни талаб қиламан. Албатта, бундан кейин ўзаро ҳамкорлигимизда йигитлардан имкон қадар яхшироқ ишлашларини кутиб қоламан. Умид қиламанки, вақт ўтиб бориши билан ҳаммаси ўз изига тушади.

«Футболда натижа биринчи ўринда туради»

- Тўғри, мен ҳам ҳужумкор ва ҳар қандай кишининг кўзини қувонтирадиган томошабоп ўйин тарафдориман. Бироқ истак билан хоҳишнинг реалликка мос келиши доим учрайвермайди. Мен ҳам ихтиёримдаги бор футболчиларнинг имкониятларидан келиб чиққан ҳолда иш юритишга ҳаракат қиламан. Шукрки, қўл остимдаги йигитларнинг иштиёқи баланд. Улар «Насаф»дек кучли рақибни тор-мор келтириш орқали қўлларидан иш келишини исботлаб бердилар. Бундан кейин ҳам тайёргарлик ишларини кучайтиришга зўр берамиз. Футболчилар бир-бирлари билан қанчалик кўп ўйнасалар, ўзаро тушуниш ҳисси ҳам шунга монанд равишда ошиб бораверади. Ҳа, яна такрорлайман: «Насаф»га қарши биз натижа учун ўйнадик. Мураббий натижани таъминлай оладиган усулдан келиб чиққан ҳолда иш тутади. Яна шуни унутмаслик керакки, ўйин қанчалик қизиқарли ёки бунинг акси ўлароқ зерикарли кечмасин, энг биринчи навбатда натижа сақланиб қолади. Вилоятда футбол байрами бўлгани туфайли ютқазишга ҳаққимиз йўқ эди. Футболда натижа биринчи ўринда туради. Буни қайта-қайта такрорлашим мумкин. Ўзингиз ўйланг, чиройли тўп сурган ҳолда мағлубиятга учраш яхшими ёки натижани сақлаб қолиш учун ўйнашми? Сўзим сўнггида клубимизга шундай имкониятларни яратиб берган вилоят раҳбариятига чуқур миннатдорлик билдириб қоламан. Энг муҳими биз ғалаба қозондик. Бошқа нарса ҳақида ўйламайман. Боя айтдим, бугун бизда босим жуда катта эди. Аммо мен ва футболчиларимда ўзимизга бўлган ишонч катта эди. Биз майдонга фақат ғалаба учун тушгандик, ҳаттоки, дуранг ҳам жамоамизни қониқтирмасди. Бугунги футбол байрами учун Андижон халқини ғалаба билан хурсанд этганимиздан жуда хурсанд бўлдик.

«Ўйинимиздаги айрим муаммоларни бартараф этишимиз керак»

- Бирор-бир футболчидан айбни қидириш нотўғри. Баъзида футболчининг ўйини чиқади, яна баъзида эса йўқ. Тўғри, дарвозабон гол ўтказдими, қайсидир маънода унда ҳам айб бўлади. Тўғри, ўйинимизда ҳам муаммолар бор. Нафақат ҳимоя ёки дарвозада, балки ҳужумда ва ўйинни ташкил қилишда камчиликларимиз билиниб турибди. Биз эса ушбу муаммоларни бартараф этиш учун кўп меҳнат қилишимиз керак. Лекин муҳими биз дастлабки ғалабани қўлга киритдик. Мухлислар эса жамоамизни бутун ўйин давомида қизғин қўллаб-қувватлаб туришди.