Дембеле: "Олтин тўп" шахсий мукофотдир, лекин аслида уни биз бир жамоа сифатида қўлга киритдик"

Усмон Дембеле 2024/2025-йилги мавсумнинг энг яхши футболчиси деб топилиб, "Олтин тўп" совринини қўлга киритди. Футболчи мукофотни ютганидан сўнг ўз фикрларини билдирди.

"Ҳаммага миннатдорчилик билдираман. Бу ростакамига ишониб бўлмайдиган ҳолат. Ҳис-туйғуларимни ифодалашга сўзлар етарли эмас. ПСЖда ажойиб бир мавсум ўтказдим. Катта лаҳзаларни бошдан кечирдим. Бир оз ҳаяжондаман, бу осон эмас. Айниқса, бу мукофотни Роналдиньонинг қўлидан олиш — фавқулодда воқеа. Менга 2023-йилда мурожаат қилган ПСЖ клубига раҳмат айтмоқчиман. Клуб президентига, жамоанинг барча аъзоларига миннатдорчилик билдираман. Улар ажойиб бир оиладир. Биринчи кунданоқ президент ва бошқалар менга дўст ва оила аъзоси каби муносабатда бўлишди.

Шунингдек, ПСЖ штабининг барча аъзоларига алоҳида ташаккур билдирмоқчиман. Улар менга ниҳоятда яхши муносабатда бўлишди. Луис Энрике — у ҳозир мен учун отадек. Футбол йўлимда у жуда муҳим бўлган, ҳали ишларим тугамаган бўлса ҳам. Барча жамоадошларимга ҳам миннатдорчилик билдираман. Деярли барча совринларни қўлга киритдик. Сиз ёнимда бўлдингиз ва биз бирга даражамизни оширдик, жамоавий ютуқларга эришдик. "Олтин тўп" шахсий мукофотдир, лекин аслида уни биз бир жамоа сифатида қўлга киритдик.

Шунингдек, ўйнаган барча жамоаларимга ҳам раҳмат айтаман: "Ренн"га, "Боруссия Дортмунд"га ва доимо орзу қилган клубим — "Барселона"га. У ерда Месси ва Иньеста каби футболчилар ёнида футбол сабоқларини ўрганиш имконига эга бўлдим. Бу катта тажриба эди. Жуда бахтийорман. Бу мукофотни қўлга киритган афсоналарнинг рўйхатига қарасам… Мен жамоам учун Европа Чемпионлар лигаси ва Лига 1ни ютуш учун курашдим ва энди бу совринни ҳам қўлга киритдим. Ҳақиқатан ҳам ҳайратланарли. Жуда хурсандман ва фахрланаман."