Bunaqa o‘yinchi kerak emas! Anchelotti bir fubolchini “Real”dan haydayapti

“Real” himoya chizig‘ida o‘yinchi etishmaslik tufayli qiynalayotgan bo‘lishiga qaramay, bosh murabbiy Karlo Anchelotti 27 yoshli markaziy himoyachi Xesus Valexoning klubdan ketishini istayapti.

AS nashrining yozishicha, italiyalik mutaxassis ispan futbolchisini “Real” darajasiga mos kelmasligini ta’kidlamoqda. Hatto, tarkib tanlashda markaziy himoyachiga ehtiyoj yuzaga kelgan pallada ham murabbiylar shtabi boshqa pozitsiyadagi o‘yinchilarni himoya o‘rtasida o‘ynatishni echim sifatida qo‘llamoqda.

Bosh murabbiy qarashlaridan kelib chiqib, klub mutasaddilari Xesus Valexoga yangi bitim taklif qilmaydigan bo‘ldi. Uning amaldagi shartnomasi yozda tugaydi.

Valexo “Saragosa” tarbiyalanuvchisi hisoblanadi va “Real”ga 2015 yili olib kelingan. Biroq bu himoyachi kelganidan beri asosiy tarkibga kiritilmayapti.

“Qirollik klubi” qariyb o‘n yildan beri Xesus Valexoni “Saragosa”, “Ayntraxt”, “Vulverxempton”, “Granada” kabi jamoalarga ijaraga jo‘natmoqda.