Bilasizmi? Peru terma jamoasi 1975 yildan buyon ilk bor Amerika kubogi finaliga chiqdi

Xabaringiz bor ayni kunlarda Braziliya yashil maydonlarida Amerika kubogi bo‘lib o‘tmoqda. Bugun musobaqaning yarim finalidan o‘rin olgan Chili hamda Peru terma jamoalari bahsi bo‘lib o‘tdi. Qiziqarli va shiddatli kechgan o‘yin 3:0 hisobida peruliklarning g‘alabasi bilan yakunlandi.

E’tiborlisi, shu tariqa Peru terma jamoasi 1975 yildan buyon ilk bor Amerika kubogi finalida ishtirok etadigan bo‘ldi. Ular 44 yil avvalgi finalda Kolumbiya ustidan g‘alaba qozonib, g‘oliblikni qo‘lga kiritishgan edi.

Eslatib o‘tamiz, Rikardo Gareki shogirdlari 7 iyul kuni hal qiluvchi bahsda Braziliya terma jamoasiga qarshi maydonga tushishadi.