Berdiev bilan nega janjallashgani, Ergashevga murojaat va "Nasaf"ning qaytayotgani haqida Sherzod Nasrullaev bilan intervyu

Bugun 6 turni yakunlab bergan "Bunyodkor" - "Nasaf" o‘yini ko‘plab voqealarga boy o‘tdi. Shu bois, "Nasaf" qanot himoyachisi - Sherzod Nasrullaev bilan bahsdagi ayrim epizodlar masalasida suhbatlashdik.

Ro‘ziqul Berdiev bilan 55 daqiqada nima sababli maydonda janjallashib ketingizlar?

- To‘g‘risi, hech qanday janjal bo‘lgani yo‘q. "Ro‘zi aka" meni o‘zimni bosib olishim kerakligini, o‘yinni g‘alaba bilan tugatish uchun bu muhimligini takrorladi. Bundan avvalroq, sariq kartochka olganim bois, biroz qizishib turgan edim. Boz ustiga, Davron Ergashev menga nisbatan juda qo‘pol chiqib keldi. Hakam indagani yo‘q. Shu paytda, qizishayotganimi ko‘rgach, Berdiev oldimga kelib, "o‘zingni qo‘lga ol, qizishma deb",- deb urishib berdi. Biz murabbiyimiz bilan bunday holatlarga tez-tez tushib turamiz. Bu futbol. Mashg‘ulotlarda ham, mana shunday keskinlik yuzaga kelib turadi. Biz uchun bu normal holat. Men ularni tushunaman. Natija bugun bizga juda kerak edi. Afsus, yakunda gol o‘tkazib yubordik. Muxlislarni xursand qilmoqchi edik.

O‘yindan so‘ng, bo‘lgan voqeaga nima sabab bo‘ldi deb o‘ylaysiz?

- Hakam final hushtagini chalishi bilan, biz undan soatini ko‘rsatishini so‘radik. Menimcha, raqib qo‘shib berilgan daqiqa tugaganidan so‘ng, gol urgandek tuyuldi. Referi bilan gaplashib bo‘lgach, kiyinish xonasi tomon yurdik. Shu payt, "Bunyodkor" sardori bizni muxlislar tomonga qarata xunuk qiliqlarni qilishni boshladi. Uni to‘xtatmoqchi edik, biz tomonga intildi. Keyin, hammasi boshlanib ketdi. Bilmadim-ku, lekin bir kishi kam o‘ynagan jamoa bilan bahsda durangga bu qadar xursand bo‘lgan bo‘lsa, agar g‘alaba qozonganda nima qilgan bo‘lar edi? To‘g‘risi, Davron Ergashevning bu harakati yakunda katta janjalga sabab bo‘ldi.

Bugun "Nasaf" yaxshi o‘yin o‘tkazdi. Mavsum boshidan beri bu jamoaning ilk yorqin o‘yinlaridan biri...

- Fikringizga qo‘shilaman. Bilasizmi, futbol ishqibozlari ba’zan ko‘p narsani tushunmay keskin tanqid qiladi. Hozir, jamoamizda tarkib bilan muammolar endigina bartaraf etilmoqda. Shunda ham, kadrlar etishmayotgani rost. Sport formamizni ham tiklab boryapmiz. Jarohat olganlar qaytmoqda. Menimcha, sekin-asta yana avvalgi top darajamizga chiqib olamiz. Bizga, biroz vaqt kerak. Chempionatda ham juda ko‘p ochko yo‘qotdik deb o‘ylamayman. Kurash endi boshlandi. Bizda, vaziyatni o‘nglash uchun imkoniyat hali etarlicha bor.

Urilmagan penalti borasida fikringiz qanday?

- To‘g‘risi, mashg‘ulotlar chog‘ida bu borada ish olib bordik. Hammasi a’lo darajada chiqqan edi. Realizatsiyaga kelganida, biroz omad mendan yuz o‘girdi. Shunga qaramay, tushkunlikka tushganim yo‘q. Bu futbol. Unda hamma narsa bo‘ladi. O‘ylashimcha, yomon o‘yin o‘tkazganimiz yo‘q. Keyingi turlarda kerakli natijalarni qo‘lga kiritib, muxlislarimizni xursand qilamiz.