"Барселона"нинг собиқ юлдузлари океан ортини "ёндиришмоқда" (ФОТО)

"Интер Майами" бугун “Коламбус Крю” устидан 3:2 ҳисобида ғалаба қозонди ва МЛСнинг янги мавсумида Шарқий конференцияда муддатидан аввал ғолибликни қўлга киритди.

АҚШ клуби матбуот хизмати ҳужумчилар Лионель Месси ва Луис Суарес, шунингдек, ярим ҳимоячи Серхио Бускетс ва ҳимоячи Жорди Альбанинг янги унвон билан тушган биргаликдаги суратини эълон қилди. Қайд этиш лозимки, ушбу футболчилар ўз вақтида “Барселона” сафида бирга фаолият юритишган.

Эслатиб ўтамиз, “Интер Майами” навбатдаги мавсум якунланишига икки тур қолганда 68 очко жамғарди ва энг яқин таъқибчисини 11 очкога ортда қолдирган ҳолда Шарқий конференцияда пешқадамлик қилмоқда.

Энди “Интер Майами” навбатдаги босқичда плей-офф ғолибига топшириладиган МЛС кубоги учун курашиши керак бўлади. Унда ҳар бир конференсиядан тўққизтадан жами 18 та жамоа иштирок этади.