"Барселона"да етакчилик масаласи: Рафинья капитанлик борасида фикр билдирди

"Барселона" футболчиси Рафинья жамоа сардорлари рўйхатига киритилди. Аммо у биринчи капитанлик ҳақидаги баҳсларга ҳозирча аралашиш ниятида эмас.

Аввалроқ бош мураббий Ханс-Дитер Флик ва клуб раҳбарияти Марк-Андре тер Штегендан биринчи капитанлик мақомини олиб қўйиши мумкинлиги ҳақида хабарлар тарқалганди.

Рафинья эса ушбу масала бўйича шундай дейди:

"Агар бу орзуим деганимда, ёлғон гапирган бўлардим, чунки капитан бўлишни орзу қилмаганман. Лекин бу воқеа рўй берди ва жамоадошларим мени капитан сифатида кўраётганидан мамнунман".

Тер Штеген биринчи капитан бўлиб қолиши керакми?

"Ҳа, менимча, шундай бўлиши керак. Лекин бу қарор бизга боғлиқ эмас. У мен жамоага келганимдан бери ёрдам берган. Унда капитанлик рўли аллақачон бор эди. Шу боис, биз уни ҳурмат қилишимиз керак. Тер Штеген мен учун ҳар доим алоҳида инсон бўлиб қолади — у капитанликдан воз кечса ҳам. Бу масалани мураббий ёки президент ҳал қилади", — деди Рафинья Sport нашрига.