“Barselona” tan olmagan “La Masiya” yulduzlari

Yaqinda Ispaniya milliy terma jamoasining UEFA Millatlar Ligasi doirasida Ukraina hamda Germaniya termalariga qarshi uchrashuvlar uchun tarkibi e’lon qilindi. “Qizil furiya” ustozi Luis Enrike yig‘inga jalb etgan 21 futbolchidan 11 nafari “La Masiya” akademiyasi tarbiyalanuvchilari hisoblanadi. Ammo mazkur o‘yinchilarning aksariyati “Barselona” safida o‘yin amaliyotiga ega bo‘lmagani, etarlicha e’tiborga olinmagani sababli Kataloniyani tark etishga majbur bo‘lgan. Biz esa “Barselona” tan olmagan “La Masiya” yulduzlariga e’tiboringizni qaratamiz.
Andre Onana
“Barselona”ning darvozabondan ko‘ngli to‘q. Ammo mutlaqo emas. Jamoaning omadsiz o‘yinlari Ter-Shtegenning ham sabr kosasini to‘ldirmoqda. U kataloniyaliklar bilan yangi shartnoma borasida bir qarorga kela olmayapti. Qolaversa, “ko‘k-anorranglilar” tarkibida unga munosib o‘rinbosar ham yo‘q. Shu sababli, klub o‘z tarbiyalanuvchisi hisoblangan Onanaga bir necha bor taklif yubordi. Kamerunlik posbon “Ayaks” tarkibidagi ishonchli harakatlari bilan boshqa grandlarni ham o‘ziga qaratganligini hisobga olsak, muammolar girdobidagi “Barsa” rahbariyati oldida kechiktirib bo‘lmas yana bir vazifa turibdi.

Erik Garsiya
“La Masiya”ning U-16 jamoasi tarkibida o‘zini ko‘rsatgan Garsiyaga keyinchalik klub tomonidan e’tibor qaratilmadi. Kataloniyada uning kelajagiga shubha ostida qarashar, asosiy tarkibda debyut qilishi tobora armonga aylanib borar edi. Natijada, u “Manchester Siti” taklifini bajonidil qabul qiladi va professional faoliyatini “shaharliklar” tarkibida boshlaydi. Aytish joizki, Erik bugungi kunda Gvardiolaning umidli futbolchilaridan biri hisoblanadi. Pep “Barselona”da bosh murabbiylik qilgan davrda “La Masiya” mashg‘ulotlarini kuzatar, u erdan iste’dodlarni saralashga harakat qilardi. Demak, o‘shanda yosh Garsiyaning qaysidir jihati ispaniyalik mutaxassis e’tiborini o‘ziga jalb qila olgan.

Ektor Belerin
“Barsa” qanotlarida tezkor futbolchilar doim bo‘lgan. Belerin ham ulardan biri bo‘lishi mumkin edi. Ammo “La Masiya”da 8 yil harakat qilgan Ektorga yakunda asosiy tarkibdan joy berishmadi. Bu uning ruhiyatiga salbiy ta’sir ko‘rsata olmadi, ispaniyalik fulbek nimalarga qodirligini barchaga isbotlab qo‘ydi. 2018 yilda u 37 km/s tezlik bilan dunyoning eng tez yuguruvchi futbolchilari ro‘yxatidan o‘rin oldi. Transfer summasi ham shunga yarasha 40 mln evroni tashkil etardi.

Tyago Alkantara
Yuqoridagi futbolchilardan farqli o‘laroq, Alkantara “Barselona” asosiy tarkibida harakat qilgan. Umumiy 5 yil va 68 ta o‘yin uning Kataloniya super klubidagi faoliyatini tasvirlab beradi. Ammo rahbariyatning tushunarsiz qarorlari uni “Barsa”dan ketishga majbur qildi. Tushkun kayfiyatda Germaniyaga yo‘l olgan xavbek tez orada uni qadrlaydigan jamoani topdi. “Bavariya”ning asosiy tarkib futbolchisiga aylangan Tyago klubining trebl qayd etishida o‘zining benazir hissasini qo‘shdi.

Dani Olmo
Olmo “Xuvenil S” tarkibida o‘zini ko‘rsatgan, gollar urgan. 7 yil davomida “ko‘k-anorranglilar” libosini kiygan qahramonimiz 2015 yilda “Dinamo” Zagreb safiga qo‘yib yuboriladi. U kelajagi uchun shu qarorga kelishni ma’qul ko‘rgan. Chunki “Barselona” o‘z akademiyasi iste’dodlarini nazarga ilmas darajaga chiqib ulgurgan edi. Dani zagrebliklar safida 5 yil faoliyat yuritadi va yanada yuksalish uchun “RB Leyptsig” jamoasini tanlaydi. Shubhasiz, uning qarori o‘zini oqlamoqda. 22 yoshli xavbek bu mavsum klubi bilan Chempionlar Ligasi kuchli to‘rtligidan o‘rin egalladi. O‘z navbatida, bu natija unga bo‘lgan e’tiborni yanada oshirdi. Bugun Dani Olmo Evropa grandlari oromini o‘g‘irlagan ajoyib yarim himoyachiga aylanib ulgurgan.

Mark Kukurelya
“Ko‘k-anorranglilar” falsafasiga yaqqol mos keluvchi futbolchi bugun “Xetafe” safida javlon urmoqda. O‘z kelajagi uchun ketishni ma’qul ko‘rgan Mark yaqin kelajakda bundan ham kattaroq klublarga o‘tish ehtimoli yuqori. Qahramonimiz “La Masiya” akademiyasida futbol sirlarini o‘rganib, asosiy tarkib uchun kurashmoqchi bo‘lgan paytda klub tomonidan sotib yuboriladi. Bugungi kunda uning samarali uzatmalari, to‘p uchun kurashda faolligi, pozitsion hujumda yaxshi harakat qilishi kataloniyaliklarga asqatishi tayin edi.