"Барселона" кейинги турда Ла Лига талабларига жавоб бермайдиган стадионда ўйнаши мумкин

"Барселона" Ла Лиганинг навбатдаги ўйинини "Валенсия"га қарши Йохан Кройф стадионида ўтказиши мумкин. Мазкур арена Испания олий дивизионининг минимал талабларига сиғими бўйича жавоб бермайди - у атиги 6000 томошабинни сиғдира олади. Қоида бўйича эса минимал миқдор 8000 та этиб белгиланган.

"Mundo Deportivo" нашрининг хабар беришича, Ла Лига бундай шароитда битта учрашувни ўтказишга рухсат берган. Каталонияликларда фақат бир нечта муаммоларни ҳал қилиш қолган. Масалан, барча зарур VAR камераларини ўрнатиш.

 "Барселона"нинг "Валенсия" билан ўйини 14 сентябрь куни бўлиб ўтади. Уч турдан сўнг Ханс-Дитер Флик жамоаси ҳисобида етти очко мавжуд.