"Барселона" бош мураббийи Флик жамоанинг жисмоний ҳолатидан норози

"Барселона" устози Ханс-Дитер Флик Ла Лиганинг 8-турида "Севилья"дан 4:1 ҳисобида мағлубиятга учраган ўйиндан сўнг клубнинг фитнес бўйича мураббийлари билан учрашув ўтказишга қарор қилди.

"Sport.es" нашрига кўра, германиялик мутахассис футболчиларнинг жисмоний тайёргарлик даражасидан хавотирда эканлигини билдирган. Фликнинг фикрича, жамоа мавсумнинг ҳозирги босқичида керакли интенсивликда ўйин намойиш эта олмаяпти. У айниқса ярим ҳимоячи Педрининг ўтган йилга нисбатан сезиларли даражада суслашганини таъкидлаган. Шунингдек, умумий машғулот юкламалари режалаштирилган даражадан паст бўлиб, бу ўйинчиларнинг чарчоқлари ортганини ва тезликни сақлаб қолишни қийинлаштираётганини кўрсатмоқда.

Мураббий жамоанинг март ойига бориб энг юқори спорт формасига киришини кутмоқда. Бироқ манбада таъкидланишича, бу мақсадга эришиш учун машғулотларни сезиларли даражада кучайтириш зарур бўлади.

Маълумот учун, "кўк-анорранглилар" 19 очко билан турнир жадвалида 2-ўринни эгаллаб турибди.