"Барса" асосий юлдузларидан бирини 90 миллионга сотмоқчи

"Барселона" жорий мавсумда супер формада ва клуб требл ютиш имконига эга. “Кўк-анорранглилар” сафида порлаётган футболчи ва "Олтин тўп" учун асосий даъвогарлардан бири ҳисобланган Рафинья ёзда жамоани тарк этиши мумкин.

Каталония радиоси эфирида журналист Хави Кампос берган маълумотга кўра, Рафинья клубда “тегиб бўлмайдиган” футболчилар қаторига кирмайди. Кампоснинг айтишича, “Барселона” спорт директори Деку бразилиялик вингерни 80–90 миллион евро эвазига сотишга тайёр.

Аввалроқ, “Манчестер Сити” бош мураббийи Хосеп Гвардиола Рафиньяни ўз жамоасида кўришни истаётгани ҳақида хабарлар пайдо бўлган эди.

Жорий мавсумда 28 ёшли бразилиялик ҳужумчи 28 та гол ва 22 та голли узатма амалга оширди.