Azizjon G‘aniev: Eronga qarshi o‘yinda O‘zbekiston OTJ 50 foiz o‘yinini ko‘rsatdi
Xabaringiz bor, ayni kunlarda Tailandda U-23 Osiyo chempionati bahslari o‘tkazilmoqda. Ushbu musobaqani O‘zbekiston olimpiya terma jamoasi Eronga qarshi o‘yin bilan boshladi.
Uchrashuvda garchi vakillarimiz Islomjon Qobilovning penaltidan kiritgan golidan so‘ng hisobni ochgan bo‘lishsa-da, ikkinchi taymda o‘z darvozalaridan gol qo‘yib yuborishdi.
Bellashuvdan so‘ng terma jamoamiz vakili Azizjon G‘aniev O‘FA matbuot xizmatiga musobaqa, Eron bilan o‘yin va navbatdagi turlar borasida o‘z fikrlarini bildirib o‘tdi.
U-23 Osiyo chempionatining eng qimmat o‘yinchilari Top-10 ro‘yxatidan o‘zbekistonlik futbolchi o‘rin oldi (Foto)
- Eronga qarshi o‘yinda O‘zbekiston OTJ o‘zining nechi foiz imkoniyatini namoyish etdi?
- Eron bilan bahsda o‘zimiz kutgan o‘yinni ko‘rsata olmadik. Buni futbolchilar, murabbiylar ham aytib o‘tishdi. 50 foiz o‘yinimizni ko‘rsatdik. Dastlabki uchrashuv qiyin bo‘ldimi, hayajonmi, bilmadim. Mana Yaponiya ham mag‘lubiyatga uchradi. Boshqa jamoalar ham hali o‘z imkoniyatlarini to‘liq namoyish etmadi. Xudo xohlasa keyingi turda yuz foizlik o‘yinimizni ko‘rsatib, muxlislarni xursand qilamiz.
- Demak, turnir davomida jamoamizdan o‘sishni kutsak bo‘ladi, shundaymi?
- Albatta, hali ishqibozlarga yoqadigan o‘yinlarimizni ko‘rsatib, g‘alaba qozonamiz.
- Ob-havodan kelib chiqib, keyingi bellashuvlar uchun vaqt etarlikmi?
- Navbatdagi bahsga tiklanish uchun vaqt etarlik. Shu bois ertalabdan engil mashg‘ulotlarni boshladik. Kechqurun Xitoy terma jamoasining o‘yinini va o‘zimizning avvalgi turdagi xatolarimizni ko‘rib, xulosa chiqaramiz.
- Eron bilan bellashuvda g‘alabani ushlab qolish uchun jamoamizga nimalar etishmadi va navbatdagi turlardan oldin qaysi jihatlarimizni kuchaytirishimiz kerak?
- Forslar bizni ancha yaxshi o‘rganib chiqishgan ekan. Uzun paslarimizni ham bilib olishganligi bois futbolchilarga o‘ynashga imkoniyat berishmadi. Endi keyingi turda uslubimizni biroz boshqacharoq qilib, kutilmagan taktika orqali ijobiy natija ko‘rsatamiz.
- Guruhdan chiqib olsak, muxlislar o‘ylayotganidek uyog‘i oson kecharmikin yoki Osiyoda jamoalarning darajasi tenglashib qoldimi?
- Musobaqada kuchli jamoalar jamlangan. Guruhdan chiqsak, Olimpiada yo‘llanmasini qo‘lga kiritish uchun oxirigacha kurashamiz. Nasib qilsa, muxlislarni xursand qilamiz.
Fikrlar
Tailandda start olgan Tokio—2020 Olimpiadasiga yo‘llanma beruvchi Osiyo chempionati ilk turida O‘zbekiston termasi Eron bilan 1:1 hisobida durang qayd etdi.
Uchrashuvda terma jamoamizdan o‘yin borasida ko‘p narsa kutgandim deya olmayman. Ammo muxlis sifatida men ham g‘alaba kutganim rost. Har holda 2019-yil sentabrida Toshkentdagi (bittasi Olmaliqda) o‘rtoqlik o‘yinlarida Drulovich shogirdlari forslarni ishonchli tarzda mag‘lub etgani kutish uchun bir sabab bo‘lsa, uning amaldagi chempionligi ham bir sabab edi-da.
Musobaqaning ilk turi hech qachon oson kechmagan. Biroq vazifa Tokio—2020 ga yo‘l olish kerak ekan, xoh birinchi xoh oxirgi o‘yin bo‘lsin, har qanday raqibni yutish shart bo‘ladi. O‘zbekiston “o‘lim guruhi”da. Biroq bu ham bahona uchun sabab emas.
Boshqalarni bilmadim-u, ammo terma jamoa o‘yinida Drulovichning imzosi ko‘rindi. Futbolchilar erkin, o‘zlari xohlagandek o‘ynashga harakat qildi. Albatta, murabbiy bunga ruxsat bergani diqqatga sazovor. Biroq bu o‘z samarasini bermadi. Ko‘p holatlarda to‘p juda tez yo‘qotildi. Buning uchun Jasur Yaxshiboyevning to‘pni yo‘qotib qo‘yaverganini esga olish kifoya. Qanot himoyasida harakatlangan Alijonovlar esa o‘zlaridan kutilgan o‘yinni namoyish qila olgani yo‘q. Darvozabon borasida ham o‘yin davomida xavotirlar bo‘lib turdi. Eronliklarning jismoniy jihatdan baquvvatligi va o‘ta zich himoyaviy o‘yini O‘zbekistonning hujumlarini to‘sdi, to‘xtatib qo‘ydi. Umid qilamiz, Xitoy va Koreyaga qarshi bahsda bunday bo‘lmaydi.
Uchrashuv haqida qanday tahlil, munosabat va tanqidlar bo‘lmasin, u haqida so‘zlovchi eng yaxshi vosita bu — stastika.
Oʻzbekiston — Eron (1:1) uchrashuvi stastikasi esa quyidagicha ko‘rinish oldi
O‘zbekison—Eron
Gollar: 1-1
Zarbalar: 9-16
Aniq zarbalar: 2-3
Bloklangan zarbalar: 2-5
Zarbalar aniqligi: 22,2%-18,8%
Paslar: 497-271
Uzun paslar: 43-71
Paslar aniqligi: 87,1%-67,9%
Krosslar: 8-19
Krosslar aniqligi: 25%-36,8%
Toʻp bilan muomala: 63,8%-36,2%
Offsayd: 0-1
Burchak toʻpi: 1-4
Qoida buzish: 11-11
Navbatdagi o‘yin 12-yanvar kuni Xitoyga qarshi kechadi. Mazkur o‘yinda g‘alabadan boshqa natija O‘zbekistonning guruhdan chiqish imkoniyatini keskin pasaytirib yuboradi. Unday bo‘lmasligini esa 33 mlndan oshgan O‘zbekiston xalqi juda ham xohlaydi.