"Atletiko" etakchi futbolchisidan ayrildi

"Atletiko" Madrid hujumchisi Joau Feliks mushaklaridagi jarohat oldi va safdan chiqdi.

Jurnalist Ruben Uriyaning so‘zlariga ko‘ra, portugaliyalik futbolchi to‘liq tiklanguniga qadar yakka tartibda shug‘ullanadi. Feliks jarohat tufayli La Liganing 14-turidan o‘rin olgan "Osasuna"ga hamda Chempionlar ligasi guruh bosqichining 5-turidan o‘rin olgan "Milan"ga qarshi o‘yinlarni o‘tkazib yuboradi.

Bundan tashqari, Antuan Grizmann ham diskvalifikatsiya tufayli Italiya klubiga qarshi o‘yinda maydonga tushmaydi.

Feliks joriy mavsum “Atletiko” tarkibida La Ligada 7 ta o‘yinda ishtirok etdi va o‘z hisobiga 1 ta gol hamda 1 ta golli uzatma yozdirib qo‘ydi.