"Арсенал" "Реал" қизиққан футболчиси билан шартномани узайтирди

Лондоннинг "Арсенал" клуби матбуот хизмати марказий ҳимоячи Уильям Салиба билан шартнома узайтирилганини эълон қилди. Аввалроқ, инсайдер Фабрицио Романо футболчи 2030 йилгача мўлжалланган келишувга имзо чекишини маълум қилганди.

Франциялик ҳимоячи "Арсенал" сафида 2019 йилдан буён тўп суриб келмоқда. Нуфузли "Transfermarkt" интернет портали 24 ёшли футболчининг бозор нархини 80 млн еврога баҳоламоқда. Англия Премьер-лигасининг жорий мавсумида Уильям Салиба 4 та ўйинда майдонга тушди. Шунингдек, унинг ҳисобида Англия Лига кубогида битта ўйин ва битта голли узатма бор.

Жорий мавсум АПЛнинг 6 туридан сўнг "Арсенал" АПЛ турнир жадвалида 2-ўринни эгаллаб турибди.

Аввалроқ, матбуотда ҳимоячига "Реал Мадрид" жиддий қизиққани ҳақида кўплаб хабарлар тарқалган эди. Мадридликлар Салибани шартномаси якунлангач эркин агент сифатида ўз сафларига қўшиб олишмоқчи бўлишган.