А Серия. Турнинг марказий беллашувида 7 та гол киритилди

Италия А Сериясининг 32-тури доирасидаги "Наполи" - "Лацио" баҳси ўз якунига етди. Унда мезбонлар 5:2 ҳисобида ғалаба қозонди. 

Биринчи тайм Лоренцо Инсинье ва Матэо Политанонинг голлари билан якунига етди. Иккинчи тайм аввалида Инсинье дублни расмийлаштирди, Мертенс ҳисобни янада йириклаштирди. Шундан сўнг, римликлар бироз ўзига келиб, Иммобиле ва Милинкович-Савичнинг голлари эвазига ҳисобни қисқартириб олди. Ўйинга якуний нуқтани Осимен қўйди. 

Ғалабага эришган неаполликлар бевосита "Лацио" билан орадаги фарқни 5 тага етказиб олди. 63 очко тўплаб 5-ўринда бораётган Гаттузо шогирдларини "Ювентус"дан 2 очко ажратиб турибди. "Лацио" эса 58 очко билан 6-ўринда бормоқда.