6-chempionlik, katta afishalar, neytral maydon – Evropa Ligasi yakunlari

2019/2020 yilgi mavsum o‘z intihosiga etib kelmoqda. Futbol tarixida eng g‘aroyib voqealar bilan yodda qoluvchi bu mavsum bizga kutilmagan natijalar, noodatiy yondashuvlarga boy yil hadya etdi. Hususan, Evropa Ligasida ham shunday hodisalar ro‘y berdi. Umumiy 197 ta uchrashuv o‘tkazilgan mazkur yilda 548 ta gol urildi (har bir o‘yinda o‘rtacha 2.77 ta gol). E’tiborlisi, 2011/12 yilgi mavsumdan beri Evropa Ligasida bu kabi sermahsullik qayd etilmagan edi. O‘shanda har bir bahsda o‘rtacha 2,85 ta to‘p kiritilgan.

Nom jihatidan Evropada ikkinchi o‘rinda turuvchi mazkur turnir bu yil avvalgilaridan ham qiziqarliroq o‘tdi. Bunday deyishimizga sabablar etarli. Birinchidan, asosiy pley-off bosqichlari 1 o‘yindan iborat bo‘ldi va jamoalar taqdiri 90 daqiqa ichida hal qilindi. Bu har bir futbolchini maydonda borini berishga majbur qildi. Ikkinchidan, ishtirokchilar saviyasi ortdi. Ya’ni, chorak finaldayoq, super juftliklar shakllanib ulgurdi. “Vulverxempton” – “Sevilya” darajasidagi klublardan biri ushbu bosqichda turnirni tark etganligini ko‘rgan muxlislar uni yanada katta qiziqish bilan kuzatishda davom etishdi. Uchinchidan, bu safargi musobaqalar milliy chempionatlar yakuniga etganidan keyin boshlandi va bu faktor jamoalarga faqat shu turnirga e’tibor qaratish imkoniyatini taqdim qildi. Avvalgi yillarda ba’zi jamoalar ikkita frontda harakat qilar va aksariyat hollarda tig‘iz taqvim zararini Evropa Ligasi ko‘rar edi.

Biror turnirda chempion bo‘lish aslo oson ish emasligini “Sevilya” jamoasi isbotlab berdi. Musobaqani guruh bosqichidan boshlagan andalusiyaliklar o‘z yo‘llarida chiqqan barcha jamoalar ustidan g‘alaba qozondi. “Roma”, “Vulverxempton”, MYu va yakunda “Inter” ustidan qozonilgan g‘alabalar Lopetegi shogirdlarining darajasini belgilab berdi, g‘alaba ta’mini yanada totliroq qildi. 12 uchrashuv, 23 gol, 7 quruq o‘yin va 6-chempionlik. Bularning barchasi “Sevilya”ning Evropa Ligasida zafar quchishini ta’minladi.

Bundan tashqari, bir qancha yosh futbolchilar bu turnirda o‘zlarining eng kuchli o‘yinlarini namoyish etdi. Jumladan, MYu safida Deniel Jeyms, Meyson Grinvud, “Sevilya” tarkibida Munir Al-Xaddadi, “Inter” futbolchisi Nikolo Barella kabi iste’dodli futbolchilar uchun bu turnir tramplin vazifasini o‘tab bersa ajab emas.

Deniel Jeyms - MYu debyutanti bo‘lishiga qaramay, ishonchni oqlay oldi. APLdan farqli o‘laroq, jamoa ustozi Sulsher evrokuboklarda yosh iste’dodga imkoniyat berdi. O‘zining tezligi va texnikasidan to‘g‘ri foydalana olgan uelslik vinger bu mavsum Evropa Ligasining eng yaxshi yoshlaridan biri bo‘ldi.

Munir Al-Xaddadi - Chempionlar tarkibida eng ko‘p golni aynan qahramonimiz yo‘llaganligini hamma ham bilmaydi. Ammo andalusiyaliklarning 5 goliga mualliflik qilgan ispan forvardida endi o‘z nomini yanada kengroq yoyish imkoniyati bor.

Nikolo Barella - “Nerradzurilar” bosh murabbiyining maydon markazidagi ishongan quroli sifatida aynan Barellani e’tirof etish lozim. Maydonni ko‘rish, hujumlar tashkillashtirish qobiliyatidan tashqari, u chiroyli zarbalari bilan kerakli gollarni ham kiritib turadi. “Inter” pozitsion hujumga o‘tgan vaqtda uning zimmasiga yuklanadigan mas’uliyat uning darajasini belgilaydi.
Meyson Grinvud - yana bir manchesterlik futbolchi 18 yoshidayoq katta turnirda o‘zini yo‘qotib qo‘ymadi. O‘ziga bildirilgan ishonchga u 5 ta gol bilan munosib javob qaytara oldi. MYu keyingi mavsumda Chempionlar Ligasida ishtirok etishini hisobga olsak, Grinvud bundan ham yorqinroq porlashi mumkin.

Turnir to‘purari uchun taqdim etiladigan sovrin 8 ta gol urgan Brunu Fernandeshga nasib etdi. Portugaliyalik xavbek joriy musobaqani ikki jamoa tarkibida o‘tkazdi. “Sporting” klubi safida mavsumni boshlagan yarim himoyachi qishda manchesterliklar tarkibini to‘ldirdi. Gollaridan 5 tasini u sobiq jamoasida kiritgan bo‘lsa, mankuniyaliklarning 3 to‘piga mualliflik qilgan.

Eng ko‘p “quruq o‘yin” o‘tkazgan andalusiyaliklar kiperi Yassin Bununi musobaqaning eng yaxshi darvozaboni sifatida e’tirof etishga mutlaqo haqlimiz. 12 o‘yindan 6 tasida darvozasi daxlsizligini saqlashni uddalagan marokashlik posbon jamoasi joniga ko‘p marta aro kirdi.
Assist amalga oshirish bo‘yicha eng yuqori ko‘rsatkich MYu faxriysi Xuan Mataga tegishli. U mavsum davomida 5 bor jamoadoshlari gollariga hammualliflik qilgan. Bu orqali tajribali yarim himoyachi hali qarib qolmaganini barchaga isbotladi. Jumladan, klub bosh murabbiyi Sulsherga ham.