“Заньоло, Элдор ва Дибала — биз учун энг яхши трио” ёхуд Шомуродов Жозе Моуриньога "вызов" ташлади

"Рома" Жозе Моуриньо қўл остида “ажойиб” ҳафта ўтказди. Аввалига А Серия доирасидаги “Удинезе”га қарши баҳсда мағлуб бўлди – 0:4, кейин эса Болгарияга йўл олди. Римликлар Европа лигаси 1-тури беллашувида “Лудогорец”га ҳам имкониятни бой берди – 1:2. Бироқ “мўъжизалар” шу билан тугамади. Мутахассисларнинг фикрича, "Рома" бу мавсумда А сериядаги энг кучли ҳужумга эга, аммо иккита муваффақиятсиз ўйиндаги голларга на Абрахам, на Дибала, на Заньоло муаллифлик қилди, балки португалиялик мутахассис томонидан захирага “михланган” Элдор Шомуродов томонидан киритилди. Ўзбекистонлик форвард ўзини нималарга қодир эканлигини кўрсатишни жуда истаётган эди ва буни ўша баҳсда уддалади. Чунки “Рома”нинг сўнгги икки учрашувдаги ягона голи айнан Шомуродов номига ёзилган.

Моуриньо Элдорга чиқиш эшикларини кўрсатган

Элдор Италия футболида ўсиб бораётган юлдуз сифатида "Рома"га ўтди. Ўзбекистонлик “Женоа”да бир қанча голлар киритиб, умидли футболчи сифатида кўрилди. Шунингдек, у Тэмми Абрахамга потенциал рақиб сифатида ҳам қаралган эди.

Бироқ Шомуродов Моуриньо футболида ўзини топа олмади, аксига олиб унинг асосий рақиби ҳисобланган Абрахам ҳам ажойиб ўйин кўрсатди. Кетма-кет голлардан кейин англиялик футболчининг нархи 100 миллион еврогача кўтарилди. Шомуродов эса Тэмми фонида Рим клубининг муваффақиятсиз трансфери сифатида кўрилди. Лекин шуни ҳам таъкидлаш керакки, Элдор захира ўйинчиси сифатида 28 ўйинда майдонга тушди ва 7 та самарали ҳаракатни амалга оширди. Яъни футболчи жамоасига қандайдир йўллар билан бўлса-да фойда келтирди.

Шомуродовнинг Римдаги саргузаштлари ёзда якунланиши керак эди. Жозе Моуриньо ўзбекистонликнинг ўйини “Женоа” ва РПЛ оралиғида эканлигини, шу боис, клубга савияси ундан баландроқ ҳужумчи олиб келмоқчи эканлигини очиқ айтди.

“Охирги ўйинда ҳужумчи ўрнига ярим ҳимоячини майдонга туширганимнинг сабаби бор. Чунки бизнинг захирада яхши даражадаги ҳужумчилар йўқ. Шомуродовнинг ўйини яхшиланишини кута олмайман. “Рома”да бундай имкониятлар йўқ”, — деди Жозе.

Шундан сўнг римликлар Европа чемпиони Андреа Белотти билан шартнома имзолади ва ўзбекистонлик форвард ўзига янги клуб излай бошлади, бироқ якунда ҳеч нарса бўлмади. Элдор “Рома”да қолишини маълум қилди.

Шомуродов — лойиҳанинг бир қисми

А Сериянинг бир нечта клублари бирданига Элдор учун “овга чиқди”.

Футболчини “Монца”, “Болонья” ва “Торино” каби клублар ўз сафига қўшиб олмоқчи эканлигини маълум қилиб, римликларга таклиф билан чиқди. Жозенинг ўзбек футболчиси ҳақидаги салбий фикрларига қарамай, “Рома” 15 миллион евродан камроққа сотмоқчи эмаслигини маълум қилди. Охир-оқибат юқорида номи келтирилган жамоалар Шомуродовни сотиб олиш фикридан қайтди.

Кейинчалик, аниқроғи трансфер ойнаси ёпилиши арафасида футболчининг агенти Қаҳҳор Мўминов ҳужумчи борасида баёнот берди. Элдорнинг вакили футболчи "Рома"да қолиши ва раҳбарият ҳеч қандай жамоа билан музокара олиб бормаётганини маълум қилди. Гарчи бироз ишонарсиз бўлса-да, Шомуродов лойиҳанинг бир қисми эканлиги айтилди.

Объектив қарайдиган бўлсак, Шомуродовнинг "Рома" асосий ўйинчисига айланиш имконияти "Динамо"нинг Ўзбекистон Суперлигасида ғалаба қозониш имконияти билан деярли бир хил. Айни дамда Тэмми Абрахам клубнинг ҳужумидаги асосий футболчи бўлиб қолмоқда. Андреа Белотти Римга келиш учун захира футболчиси бўлишга ҳам тайёр эканлигини маълум қилди. Пауло Дибала эса ҳужум ортида ҳаракат қиладиган футболчи ҳисобланади. Қолаверса, аргентиналикнинг ўзи ҳам назарий жиҳатдан ҳужумчи сифатида ўйнай олади.

Аслида Шомуродов Моуриньо учун “Рома” ҳужум чизиғидаги учинчи ёки тўртинчи вариант. Шу билан бирга, олд чизиқдаги барча футболчиларнинг узоқ муддатли шартномаси бор. Мураббий ўзбекистонлик ўрнига ярим ҳимоячини майдонга тушурса, жамоа учун фойдали бўлишини очиқ айтмоқда.

Мухлисларнинг Элдорга бўлган муносабати ўзгарди

Шомуродов Римда ҳеч қачон қаттиқ танқидга учрамаган. Бироқ шуни ҳам айтиб ўтиш керакки, ёзда барча мухлислар футболчини жамоадан кетишига қарши эмас эди.

Охирги бир ҳафта ичида Элдор ҳақидаги гаплар сезиларли даража ижобий томонга ўзгарди. Шома “Лудогорец” билан ўйинда яхши имкониятга эга бўлди. Мутахассисларнинг фикрича, Белоттига қараганда анча самарали ҳаракат қилган Шомуродов боши билан ажойиб гол урди. Шундан кейин мухлислар ижтимоий тармоқлар орқали Элдорни фақатгина олқишлашди.

“Эҳтимол, мураббийлар штаби Элдорга имконият бермаётгандир?! Агар унга имкон берилса, Шома Италияда янги Кварацхелияга айланиши мумкин!”.

“Элдорнинг тўп билан қилаётган муомаласи ва майдон бўйлаб ҳаракати Абрахамдан ҳам, Белоттидан ҳам яхшироқ”.

“Заньоло, Элдор ва Дибала — биз учун энг яхши трио”.

“Моуриньо Шомуродовга имконият бермаяпти. Мураббий яхши савиядаги футболчини захирага “михлади”. Ўтган йили у "Венеция"га қарши ўйинда гол урди ва пас берди, аммо шунда ҳам Жозе унга ишонч билдирмади. Нега?”. 

Гарчи барча ОАВ Болгариядаги ўйинда “Рома”нинг энг яхши футболчиси дея Элдорни эътироф этган бўлса-да, римликлар устози у ҳақида ҳеч нарса демади.

Шомуродов ўз имкониятини қўлга киритди

Шомуродов Болгариядаги голи эвазига кейинги ўйинлар учун ўз имкониятини қўлга киритди. Жозе Моуриньонинг фаолиятида қаттиқ танқиддан сўнг захира футболчиси бўлган ва кейин жамоанинг асосий ўйинчисига айланган кўплаб мисоллар бор. Эҳтимол, кечаги голидан кейин қолган учрашувларда унга кўпроқ имконият берилиши мумкин.

Мавсум бошида Элдор бутунлай ўйин амалиётисиз қоладигандек туюларди, аммо кечаги ўйинидан сўнг унга нисбатан фикрлар ижобий томонга ўзгарди. Шу боис, у камида қишгача Рим лойиҳасининг бир қисми бўлиб қолади. Эҳтимол, қишки трансфер ойнаси пайтида Шомуродов яна бир қанча таклифлар олар?! Агар шундай бўладиган бўлса, у катта эҳтимол билан Италиянинг бошқа жамоасига ўтади. Чунки у ҳали кучли бешлик чемпионатларидаги саёҳатини давом эттира олади.

Жамшидбек Маҳмудов тайёрлади