"Ювентус" раҳбарияти Пирлога ультиматум қўйди

Туриннинг “Ювентус” клуби хўжайинлари жамоа бош мураббийи Андреа Пирлога ультиматум қўйди, деб хабар бермоқда La Gazzetta dello Sport.

Юқоридаги манбага кўра, агар жамоа А Сериянинг яқин 2 та баҳсида муваффақиятсизликка учраса, у ҳолда Пирло истеъфога чиқарилади. “Кекса синьора”ни олдинда “Торино” ва “Наполи”га қарши ўйинлар кутмоқда.

Таъкидлаш керакки, “Ювентус” жорий мавсумни жуда ҳам муваффақиятсиз ўтказмоқда. Жамоа Чемпионлар лигаси 1/8 финалида кутилмаганда “Порту”га мағлуб бўлди ва мусобақа билан хайрлашди. А Серияда ҳам Турин супер клубининг ишлари яхши эмас. Улар пешқадам “Интер”дан нақд 10 очко кам жамғарган ҳолда мусобақа жадвалида 4-ўринда бормоқда.

Эслатиб ўтамиз, Пирло “Ювентус”ни 2020 йилнинг ёзида қабул қилиб олган эди. Бундан аввал жамоани Маурицио Сарри бошқарган.