Ёш таэквондочиларимиз Қозоғистонда муваффақият қозонишди

16-17 июнь кунлари Қозоғистоннинг Олма-ота шаҳрида таэквондо WT йўналиши бўйича кичик ўсмир ёшидаги спортчилар ўртасида халқаро мусобақа бўлиб ўтди. Унда иштирок этган Тошкентнинг “Торнадо” таэквондо клуби 8 нафар спортчи билан қатнашиб, юқори натижа қайд этди.

Турли белбоғ ва ёш тоифасига қараб классификация қилинган йўналишлар бўйича ёш таэквондочиларимиз умумжамоа ҳисобида биринчи ўринни эгаллашди. Мусобақа давомида Исломжон Ўктамжонов, Шоҳжаҳон Жаҳонгиров, Аҳмаджон Солиҳов, Шамсиддин Муродуллаев ва бошқа йигитларимиз ўзларининг юқори техникаси билан ажралиб туришди.

“Бу “Челленжер” йўналишидаги халқаро мусобақа бўлиб, унда иқтидорли ёш спортчилар иштирок этишади. Шогирдларимиз бу йил ҳам ўзларининг нималарга қодир эканликларини кўрсатиб беришди. Қолаверса, бу турнир орқали ёш таэквондочиларда халқаро тажриба олиш жиҳати ҳам бор. Мусобақа якунлангач ҳозир Олма-отадаги таэквондо клублари билан қўшма машғулотлар ўтказиб, ўзаро тажриба алмашмоқдамиз. Қолаверса, бу йил сўнгида терма жамоа таркибидан жой олиш учун ўтказиладиган мамлакат биринчилигига ҳам тайёргарлик вазифасини ўтаб беради”, – дейди “Торнадо” клуби мураббийи Ахрор Асроров.

Спортчиларимиз 20 июнь куни Тошкентга қайтиб келишади.