Яхшибоев табрикларни қабул қилмоқда!
- 29-ноябр 2020, 20:35
- Zohir Toshxo’jayev
- 0
- Футбол
Ўзбекистонлик легионер Жасур Яхшибоев Солигорскнинг “Шахтёр” жамоаси таркибида Беларусь чемпионлигига эришди.
Ҳамюртимизни тарихий ғалаба билан собиқ жамоаси – “Энергетик-БГУ” ҳам табриклади.
"Шахтёр"ни чемпионлик унвони билан қутлаймиз. Бизнинг жамоамиз учун ҳам бегона бўлмаган Жасур Яхшибоевни алоҳида табриклаймиз!, - дейилади "Энергетик-БГУ" баёнотида.
Жасур Яхшибоев хориждаги фаолиятини айнан “Энергетик-БГУ” таркибида бошлади. Илк учрашувлардан тўпурарлик қобилиятини намойиш қилган ўзбек футболчиси қисқа фурсатда жамоа етакчисига айланди.
У “Энергетик-БГУ” сафида жами 14 та ўйинда майдонга тушиб, 9 та гол уришга эришди. Жасурнинг сермаҳсул ўйини Беларуснинг етакчи жамоалари эътиборини тортди. Биринчи даврадан сўнг, чемпионлик учун курашаётган “Шахтёр” ўзбек футболчисини трансфер қилди.
Жасур янги жамоасида ҳам ўзини кўрсата олди. Тез орада жамоа етакчилари қаторига қўшилган ҳамюртимиз солигорскликлар учун 13 та ўйинда майдонга тушиб, еттита гол урди ва жамоа чемпионлигига муносиб ҳисса қўшди.