Янги мураббий Файзуллаевга қандай баҳо берди?
- 1-июл 2025, 08:49
- Zohir Toshxo’jayev
- 0
- Футбол
Ўзбекистон миллий терма жамоаси ва Москванинг ЦСКА клуби ҳужумкор футболчиси Аббосбек Файзуллаев учун янги мавсум муҳим аҳамият касб этади.
21 ёшли легионеримиз терма жамоамизнинг етакчи ўйинчиларидан ҳисобланади ва келаси йили АҚШ, Канада ва Мексика биргаликда мезбонлик қиладишан жаҳон чемпионатида Аббоснинг зиммасига муҳим вазифалар юкланиши табиий.
Шу боис, Файзуллаев янги мавсумда клуб миқёсида мунтазам ўйин амалиётига эга бўлиши, маҳоратини чарҳлаб бориши ва юқори спорт формасини ушлаб туриши талаб этилади.
Легионеримиз ўйнаётган ЦСКАда кутилмаганда жиддий ўзгариш рўй берди. Жамоани мамлакат кубоги ғолиби ва чемпионат бронза медали совриндорига айлантирган сербиялик мураббий Марко Николич бошқа клубга ўтиб кетди. Унинг ўрнини швейцариялик мутахассис Фабио Челестини эгаллади.
Аббос Ўзбекистон терма жамоаси сафидаги ўйинлардан кейин муайян муддат ҳордиқ чиқариб, “армиячилар”нинг тайёргарлик жараёнига қўшилди. Фабио Челестини ёзги ўқув-машғулот йиғинлари ҳақида интервью бериб, ўзбек футболчисини ҳам жамоа етакчиларидан эканини алоҳида таъкидлади.
- Бутун жамоа йиғинда жам бўлишини кутиш керак. Дастлабки кунларда биз бир неча муҳим ўйинчилар – Иван Обляков, Данил Круговой, Сейку Койта ва Аббосбек Файзуллаевсиз ишлашимизга тўғри келди.
Биз жамоага яқинда келганмиз, футболчилар эса эндигина таътилдан чиқди, дастлабки кунлардаги машғулотлар ўзига хос тарзда енгиллаштирилган бўлади ва асосий эътибор функционал тайёргарликка қаратилади, - деди Фабио Челестини.
Ўз навбатида, Челестини ўзи билан бирга мураббийлар штабида фаолият юритадиган мутахассислар катта тажрибага эга эканини айтди.
- Хосе Блеса мен билан “Базель”да ишлаган. Бу энг юқори даражадаги футболчилар билан ишлаган, бой тажриба тўплаган зўр нутрициолог. Хусусан, у “Ан-Наср”да Криштиану Роналдуга ёрдам берган.
Хавьер Нойя жисмоний тайёргарлик мураббийи. Илгари “Спартак” ва “Рубин”да ишлагани боис рус тилида зўр гаплаша олади.
Аввал бир неча хориж мамлакатларида, жумладан, Италия ва Мексикада ишлаб, катта тажриба орттирган Манель Экспосито ҳам келди. Шунингдек, мураббийлар штабида Алексей Березуцкий, Дмитрий Крамаренко ва Игорь Аксенов каби маҳоратли мутахассислар ишини давом эттираётганидан ҳам мамнунман, - деди Фабио Челестини.
Аббосбек Файзуллаев 2023 йилнинг августида “Пахтакор”дан ЦСКАга кўчиб ўтган эди. Шундан бери истеъдодли футболчимиз Россия Премьер-лигаси ва мамлакат кубоги мусобақаларида жами 71 та учрашувда майдонга тушиб, рақиблар дарвозасини саккиз маротаба ишғол қилди ва жамоадошларига 22 та голли пас узатди.
Ҳамюртимизнинг москваликлар билан имзолаган шартномаси 2026 йилнинг ёзигача давом этади. Кейинги пайтда Аббосбек Файзуллаевга Англиянинг “Вулверхэмптон” ва Туркиянинг “Башакшеҳир” клубларидан қизиқиш бўлаётгани ҳақида ахборотлар тарқатилган эди.