"Янги мавсумда энг юқори даражада ўйин кўрсатамиз" ёхуд Никола Лазаревич "Қизилқум"ни қанчалик ўзгартира олади?

Сайтимиз ўқувчилари яхши билишадики, “Қизилқум” клубига сербиялик Никола Лазаревич бош мураббийлик қилади. Бу хусусида Sports.uz сайтида хабар бердик.

29 январь куни 44 ёшга тўладиган мутахассис Навоийда ишга киришди. У клуби билан мавсум охирига қадар мўлжалланган шартнома имзолади. Шундан сўнг, Лазаревич Sports.uz мухбирининг саволларига жавоб қайтарди.

- “Қизилқум” клуби бош мураббийига айландингиз. Аслида сизни бу ерларга қандай “шамоллар учирди"?

- Ўтган йили ҳам бу масала юзасидан улар билан суҳбатлашгандик. Лекин ўшанда бу ишлар охирига етмай қолганди. Бу сафар эса аниқ таклиф келди ва мен рози бўлдим. Айтишим мумкинки, биз тезда келишувга эришдик. Шу ўринда жамоа раҳбариятига ҳам миннатдорчилик билдираман. Ишонаманки, ўртамиздаги ҳамкорлигимиз жуда яхши чиқади.

- Хориждан келган мураббий сифатида Ўзбекистонда биринчи бор ишлайсиз. Лекин нима учун бир йиллик шартнома имзоладингиз? Ўйлаган режаларингизни амалга ошириш учун ушбу муддат сиз учун етарлими?

- Мураббийлик иши шундайки, у эртага қаерда бўлишини ҳеч қачон олдиндан била олмайди. Кўп нарса натижага боғлиқ. Шу боис шартномалардаги шартлар борасида келишаётган чоғимизда муддат масаласида узоқ ўйлаб ўтирмадим.

- Ундай бўлса айтинг-чи, клуб раҳбарияти олдингизга қандай вазифа қўйди?

- Клуб раҳбарияти билан жуда кўп масалаларни маслаҳатлашдик. Бинобарин, янги мавсумга доир ишларни ҳам гаплашиб олдик. Бемалол айтишим керакки, раҳбарият олдимизга юқори вазифани қўйди. Яъни, ўзимиз иштирок этадиган турнирларда яхши натижа учун курашиш ва ўйинимизни ўтган йилгидан кўра янада кучайтириш вазифасини қўйди.

- “Қизилқум” таркиби янгиланяпти. Таркиб қандай бўлишини истайсиз? Бош мураббий сифатида қайси легионерларни жамоангизда кўрмоқчисиз?

- Ҳа, таркиб ўзгаради. Аммо у қадар катта ўзгаришлар юз бермайди. Клуб бунгача бир нечта ўйинчилар билан шартномалар имзолаб бўлди. Улар ўзбекистонлик ва шу билан бирга легионерлар билан ҳам. Бизда тўлдиришимиз керак бўлган яна бир-иккита позициялар қолди. Ўйлайманки, Туркиядаги йиғинимизга қадар таркибимизни тўлдириб оламиз. Таркиб масаласида биз жамоа директори Ҳамиджон Актамов билан маслаҳатлашамиз. Бу инсон билан гаплашишни бошлаганимиздан бери фикрларимиз бир жойдан чиқяпти.

- Айтинг-чи, шартнома тузилаётганда сизни кўпроқ нима ўзига тортди?

- Биринчи навбатда Ўзбекистон чемпионатининг сифати ва даражасини айтган бўлардим. Мен ҳали ҳам ўзбек футболини Осиёдаги энг яхшиларидан бири деган фикрдаман. Бу ерда клубларнинг барқарорлиги ва раҳбарларнинг амбициялари ўзига хос.

- Мураббий сифатидаги қайси ўйин услуби сизга ёқади. Хўш, янги мавсумда “Қизилқум”да қандай ўйинни қурмоқчисиз?

- “Қизилқум” клубининг ўйин услуби ва фалсафаси ҳақида гапиришга ҳали эрта. Аммо шуни айтишим мумкинки, “Қизилқум” янги мавсумда энг юқори даражада ўйин кўрсатишга ҳаракат қилади.

- Янги жамоангизнинг ўтган йилги ўйинларини кўрган бўлсангиз керак. Унинг имкониятларини қандай баҳолайсиз?

- Ҳа, кўрдим. Бу ҳам мени ўзига жалб қилган вазиятлардан бири. Клуб ривожланишда ва юқори натижаларга эришиши учун давом этади. Чемпионатнинг ҳар бир учрашувида чиройли ўйин кўрсатиш ҳам биз учун жуда муҳим.

- Ўзбек футболидаги плюс ва минуслар нималардан иборат?

- Фикримча, янги мавсум ҳам жуда кучли кечади. Чунки сифатли ва кучли жамоалар етарлича топилади. Кўплаб клублар чемпионликка даъвогарлар ҳисобланмоқдалар. Рақобат ҳам юқори даражада бўлади. Шунингдек, ўзбек футболи савиясини ошириш йўлида меҳнат қилаётган Ўзбекистон миллий терма жамоаси бош мураббийининг ҳам саъй-ҳаракатларини ёдда тутиш керак. Шахсан мен учун ҳар доим ўзбек футболи борасида ижобий таассуротларим бўлган.

- Жамоанинг 39 ёшли дарвозабони Игнатий Нестеровнинг кейинги тақдири нима бўлади? У клубда қоладими ёки...

- Игнатий Нестеров яқинда қайтади ва жамоа сафига қўшилади. Ана шунда биз барчасини муҳокама қилиб оламиз. Фикримча, ҳозир бу масалада гапиришга ҳали эрта. Унинг ёшига келсак, бу якуний қароримизга сабаб бўла олмайди.

- Бунгача охирги ишлаган клубингиз Саудия Арабистонининг “Ал-Таавун” жамоаси эди. Билишимча, улар Осиё Чемпионлар лигасида иштирок этади...

- Умуман олганда, Саудиядаги фаолиятимдан қониқиш ҳосил қилдим. У ерда футбол ташкилотчилиги жуда юқори даражада. Ўтган йили Саудия Арабистони Кубогида ютқазиб қўйдик. Аммо клуб Осиё Чемпионлар лигаси саралаш босқичида иштирок этиш имкониятини қўлга киритди. Агар гуруҳ босқичига чиқишса, бундан фақат хурсанд бўламан.