"Хўжанд" бош мураббийи: "Навбаҳор", "Нефтчи" ва "Насаф". Чемпионлик ушбу клублардан бирига насиб қилади"

Кеча Тожикистоннинг “Хўжанд” клуби Наманганда “Навбаҳор”га қарши ўртоқлик учрашувида иштирок эди. Жанговар тарзда кечган ўйинда 2:2 ҳисоби қайд этилди. Мазкур беллашувдан сўнг “Хўжанд” жамоаси бош мураббийи Рустам Ходжаев билан суҳбатлашдик.

- Рустам ака, "Навбаҳор"га қарши ўйин қандай ўтди? Бундан "Хўжанд" клуби қандай фойда олди?

- Ҳа, бу ўйин яхши ўтди. “Навбаҳор” ҳам яхши ўйин кўрсатди. Баҳс бошида бизнинг футболчиларимиз талаб қилган нарсаларимизни бажара олмадилар. Кейин мослашиб кетдилар. Албатта, биз бу учрашувдан катта фойда олдик. Ўзбекистоннинг етакчиларидан бирига қарши ўйин албатта футболчиларимиз учун асқотади.

- Ўзбекистон чемпионатини кузатяпсизми? Чемпионлик учун кимда имконият кўпроқ, деб ўйлайсиз?

- Албатта, Ўзбекистон чемпионатини кўрамиз. “Навбаҳор”, “Нефтчи”, “Насаф”нинг ўйинлари ажойиб. Шу учала клубдан бири чемпион бўлади.

- “Хўжанд” сафида ўзбекистонлик легионерлар бор. Улардан қониқяпсизми ёки жамоада янги ўзбекистонлик футболчилар пайдо бўлиши мумкинми?

- Ҳа, таркибимизда уч нафар ўзбекистонлик футболчилар тўп суришяпти. “Навбаҳор”га қарши иккитаси ўйнади, биттаси ўйнамади. Ислом Тошпўлатовни жароҳати бор. Кўрамиз, балки яна Ўзбекистондан яхши футболчиларни топсак чақириб, таркибимизни янада кучайтирамиз.

- Агар “Хўжанд” Ўзбекистон чемпионатида қатнашса қандай натижа кўрсатади, деб ўйлайсиз?

- Билмадим. “Хўжанд” Ўзбекистон чемпионатида қатнашса тажрибамиз етадими-йўқми, ҳайронман. Чунки Ўзбекистон чемпионатининг савияси кучли. Лекин ўйлайманки, пастки ўринларда бўлмаймиз.

- Кейинги режалар қандай? Яна ўзбек клубларига қарши ўртоқлик ўйинлари бўладими?

- Ўзбекистон клублари ўртоқлик ўйинлари учун чақиришса албатта бориб ўйнаймиз. Мана, “Навбаҳор” ҳар йили чақиради, бориб ўйнаб келамиз. “Нефтчи” ҳам таклиф қилганида буни ижобий қабул қилдик. Биз ҳам Хўжандга чақириб ўйнашга ҳаракат қиламиз. Ўзбек клубларига қарши ўйинлар биз учун тажриба ошириш борасида жуда керак.

- Умуман олганда, жамоангизнинг Тожикистон чемпионатидаги иштирокидан қониқяпсизми?

- Бу йил таркибимизга янги ўйинчилар кўп келди. Шунинг учун чемпионатни яхши бошлай олмадик. Аммо ўйинимизни кучайтиришга ва юқори ўринларга кўтарилишга ҳаракат қиламиз.

Шуҳратбек Жўраев.