WBC янгиланган рейтингини эълон қилди. Ўзбек боксчилари қуйидаги поғоналарда қайд этилган

Профессионал бокснинг таянч ташкилотларидан бири ҳисобланган Бутунжаҳон бокс кенгаши (WВC) янгиланган рейтингини эълон қилди. Унга кўра, кучли 15 таликда фақатгина ярим ўрта вазн тоифасида (-66,6 кг) ўз фаолиятини олиб бораётган ҳамюртимиз Қудратилло Абдуқаҳҳоров 9-ўринни эгаллаб турибди. WВC бошқа йўналишлардан фарқли ўлароқ 40 талик рейтингни тузади. 

Супер ўрта вазнда (-76,2 кг) Азизбек Абдулғаффор 31 ва супер ярим ўрта вазнда (-69,8 кг) Исроил Мадримов мазкур йўналишда 18-поғонада қайд этилган бўлса, супер енгил вазн тоифасида (-63,5 кг) Шоҳжаҳон Эргашев 25 ҳамда Шаҳрам Ғиёсов 34-ўринга лойиқ топилди. Биринчи ярим енгил вазн тоифасида (-55,3 кг) WBC Болтиқ бўйи мамлакатлари минтақавий камари соҳиби Исломбек Пирманов 40, биринчи ўта енгил вазнда (-48,9 кг) Ҳасанбой Дўсматов 23-ўринни банд этган. 

Мазкур йўналиш бўйича бошқа боксчиларимиз эътироф этилмаган.