Тўпни қайтаролмасанг, жойингни бўшат!

“Манчестер Юнайтед” премьер-лиганинг дастлабки икки учрашувида ўз дарвозасидан олтита тўп олиб чиқди. Ҳозир Эрик тен Хаг жамоаси мусобақа жадвалида охирги поғонада турибди.

Давид де Хеа лигада энг кўп гол ўтказган посбонлардан бири ҳисобланади. Унга рақобат туғдириш мақсадида клуб раҳбарияти Мёнхенгладбахнинг “Боруссия”си вакили Ян Зоммерни олиб келмоқчи.

Манбаларнинг таъкидлашича, 33 ёшли швейцариялик дарвозабон Манчестерга келиб, Давид де Хеанинг ўринбосарига айланади. Агар рақобатда испан футболчисини енгса, табиий равишда дарвоза унга топширилади.

Зоммернинг мёнхенгладбахликлар билан шартномаси 2025 йилнинг ёзигача давом этади. Унга Англия премьер-лигасининг бошқа клубларидан ҳам қизиқиш бўляпти.