Тезкор: Файзуллаев трансферига нарх белгиланди!
- 16-июл 2025, 16:57
- Zohir Toshxo’jayev
- 1
- Футбол
Ўзбекистон миллий терма жамоаси ва ЦСКА клуби ҳужумкор футболчиси Аббосбек Файзуллаев янги мавсумни Европанинг кучайиб бораётган чемпионатларидан бири – Туркия Суперлигасида бошлаши мумкин.
Бир неча нуфузли манбаларнинг маълум қилишича, 21 ёшли универсал ўйинчига “Истанбул Башакшеҳир” жиддий қизиқиш билдирмоқда.
Янги мавсумда Суперлигада совринли ўринлар ва Европанинг нуфузли турнирлари йўлланмаси учун курашишни мақсад қилган истанбулликлар таркибни кучайтиришга алоҳида эътибор қаратмоқда. Бу клуб яқинда Ўзбекистон миллий терма жамоаси сардори ва энг зўр тўпурари Элдор Шомуродовни “Рома”дан олган эди.
Энди асосий эътибор Файзуллаевга қаратилди.
Сўнгги маълумотларга кўра, “Истанбул Башакшеҳир” ўзбек футболчиси бўйича москваликлар билан фаол тарзда музокара олиб бормоқда. Улар легионер учун “армиячилар”га 7,5 миллион евро бадал пули ва қўшимча бонуслар ваъда қиляпти.
Аҳамиятлиси, турклар ушбу трансфер учун мўлжалланган 7,5 миллион еврони биттада ЦСКА ҳисоб-рақамига ўтказиб беришга тайёр.
Айни пайтда Россия футболи экспертлари Файзуллаев трансфери бўйича ўз муносабатларини билдирмоқда. Айрим мутахассислар Аббос Россия Премьер-лигасида қолиши мақсадга мувофиқ эканини таъкидламоқда. Бироқ кўпчилик ўзбек футболчисининг янги чемпионатга кўчиб ўтишини маъқуллаяпти.
Хусусан, ЦСКАнинг собиқ ҳимоячиси Иван Таранов бу масала бўйича қуйидаги фикрни билдирди.
- Энг аввал, Аббосбек Файзуллаевнинг ўзи нималарни ўйлаётганини билиш керак. Агар у ўзининг ўзишини бошқа чемпионат билан боғлаётган бўлса, ЦСКА уни қўйиб юбориши тўғри бўлади.
Бироқ Аббос Россияда қолиш иштиёқи ва ЦСКАга садоқати кучли бўлса, бу даражадаги ўйинчини нима қилиб бўлса ҳам, жамоада олиб қолиш лозим.
Ўйин схемалари оддий нарса. Майдонда футболчилар ўйнайди. Шаблонлар бўйича ўйнаб бўлмайди, чунки қарорларни зудлик билан қабул қилиш керак. Файзуллаевнинг ЦСКАдаги келажагини янги ўйин схемасидан келиб чиқиб белгилаш нотўғри. Футболчилар турли схемаларга мослаша олгани учун ҳам профессионал ҳисобланади, - деди Иван Таранов.
Аббосбек Файзуллаевнинг ўзи келажаги ҳақида бирор маротаба бўлса ҳам аниқ фикр айтмаган. Хусусан, Россия Суперкубоги учун бўлган баҳсдан кейин ҳам легионеримиз келажаги ҳақидаги саволга мавҳум жавоб берди.
- Жаҳон чемпионатига чиқиш – тарихий воқеа. Бироқ ЦСКА билан қўлга киритилган икки соврин ҳам мен ва оилам учун муҳим. Ҳар бир жараённинг ўз қиймати бор ва шу учун ҳам бу икки муваффақиятни таққосламайман.
Супер кубок учун бўлган учрашув ЦСКАдаги охирги ўйин деса бўладими? Мен бу нарса ҳақида гапирмоқчи эмасман. Чунки нималар бўлишини ўзим ҳам билмайман, - деди Аббосбек Файзуллаев.
2023 йилнинг августидан бери ўзбекистонлик легионер “армиячилар” жамоасида жами 72 та учрашувда майдонга тушиб, рақиблар дарвозасини саккиз маротаба ишғол қилган ва жамоадошларига 22 та голли пас узатган.
Transfermarkt портали экспертлари томонидан саккиз миллион еврога баҳоланаётган Аббосбек Файзуллаевнинг ЦСКА билан тузган шартномаси 2026 йилнинг ёзигача давом этади. Томонлар ўзаро келишган ҳолда ҳамкорликни яна бир йилга узайтириши мумкин.