Терма жамоа мураббийини унинг сафарда эканлигидан фойдаланиб тунаб кетишди

Шанба куни Португалия терма жамоаси бош мураббийи Роберто Мартинеснинг уйида ўғрилик содир бўлди.

"А Bola" нашрининг хабар беришича, жиноятчилар уйга бостириб кириб, қиймати бир миллион евродан ошиқ бўлган заргарлик буюмлари ва соатларни ўмарган. Босқин пайтида уйда қоровул ходим бўлган. У ертўлага тушиб кетгани боис, ўғриларнинг кириб келганини сезмаган, кейинчалик эса айнан у уйнинг тунаб кетилганини ва қимматбаҳо буюмлар йўқолганини аниқлаган. Мартинеснинг ўзи ўша куни сафарда эди.

Португалия миллий терма жамоасининг мураббийи ЖЧ-2026га тайёргарликни давом эттирмоқда. Унинг шогирдлари саралаш босқичида Арманистон ва Венгрияни мағлуб этиб, гуруҳда ишончли старт олди.