Суперлига 10-тури ҳақида!

Бугундан Ўзбекистон Суперлигасида 10-тур бошланади. Бу сафарги баҳслардан нималар кутсак бўлади? Бирма-бир таҳлил қилиб кўрамиз: 

"Сурхон" - "Сўғдиёна"

Қуйи олтиликдаги жамоалар жангга деярли бир хил кайфиятда етиб келишаётганини таъкидлаб ўтиш жоиз. "Сурхон" 9-турда ҳозир "отнинг устидаги" "Динамо"га енгилди. Ўз навбатида "Сўғдиёна" жадвалда пастки томондан биринчи ўринда бораётган "Шўртан"ни ўз уйида мағлуб эта олмади. Бу жиззахликлар учун мағлубиятга тенг дуранг бўлди. Иккала жамоа "Алпомиш" аренада бир-бирига нима таклиф қилади? 

Иван Бошкович шогирдлари асосан кучли болқонлик легионерларга таянмоқда. Айниқса, Люпчо Дориевнинг сўнгги мавсумлари учун алоҳида мақола ёзсак арзийди. Айнан мана шу ҳислатларни мураббий устунликка айлантира олса ва Дориевнинг зарбалари кўнгилдагидек чиқиб турса, "бўрилар"дан нимадир кутсак бўлади.

"Сурхон"да ёшлик ва тезкорлик уйғунлиги бор. 9 баҳсда 3 та гол уришга эришган Муҳаммадали Абдураҳмонов ва яна бир қатор ёш ҳужумчилар ўзларининг иштиёқи ҳамда тезкорлиги билан рақибга жиддий қаршилик кўрсатишга уринади. Наздимда, бу баҳсда фаворит йўқ. Иккала жамоа ҳам бир-бирига тенг жанг таклиф эта олса керак.

"Бухоро" - "Динамо"

Ўтган турда "уйқудаги "Пахтакор"ни янги мураббий бирдан уйғотиб юборди. Бунинг касрига Бақоев шогирдлари қолишди. 0-6 ҳисобидаги мағлубият қанчалик жамоага таъсир қилади, буни биз билмаймиз. Бироқ, мураббий буни билиши ҳамда жамоани яхши тайёрлай олиши шарт.  Акс ҳолда, "Бухоро" "Шўртан" билан биргаликда қуйи лигага тушиб кетишга асосий даъвогарлардан бирига айланади.

"Динамо"да эса ишлар беш. Клуб жадвалда кучли учликда. Бу турдаги рақиби ҳам ғалаба қозонса бўладиган жамоа. Абрамов ниҳоят ўрталиқни топа олди. Самарқандликлар ўта ҳужумкор эмас, балки, мослашувчан ўйин намойиш этишяпти. Ўтган турда ҳам рақиб "Сурхон"да бир неча вазиятлар бор эди, аммо дарвоза дахлсизлигини сақлаб қолиш вазифаси уддаланди. 

Энди бу беллашувда фаворит бор. Юқори спорт формадаги "Динамо"нинг тобора чўкиб бораётган "Бухоро" олдидаги ғалаба имконият юқорироқ. Камига беллашув Бухорода эмас, Тошкентда ўтказилиши ҳам самарқандликларнинг фойдасига хизмат қилади.

"Қўқон-1912" - "Насаф".

"Чақилмас ёнғоқ"ни қандай қилиб чақиш кераклигини ўтган турда ОКМК барчага кўрсатиб берди. "Насаф" ҳам бу ишни эплай олиш салоҳиятига эга. Бироқ, Қўқонда муҳлислар қаршисида мезбонларни енгиш унча-мунча жамоанинг қўлидан келмайди. Жорий мавсум Баҳром Ҳайдаров қарши ҳужумга асосланган ақлли футболи билан ҳамманинг эътиборига тушишга улгурди. Бироқ, олдинги баҳсда Қосимов шогирдлари бу услубга чора топа олди. Рўзиқул Бердиев ҳам ўзининг ҳужумкор тактикаси билан иккинчи рақамда ўйнайдиган клубни енгиш йўлини топиши керак.

Ҳафта ўртасида қаршиликларнинг кубокдаги баҳси ҳам қўқонликларга жисмоний томондан сал бўлса-да, устунлик тақдим этади. "Midweek"даги "Пахтакор" - "Насаф" учрашуви "аждарлар"нинг Ўзбекистон кубогидаги тақдирини ҳал қилди, қаршиликлар кубокдаги юришини гуруҳ босқичидаёқ тўхтатди. Бу дам оладиган "Қўқон-1912" учун фойдасига ишлайди. Шундай бўлса-да, ҳар қандай ҳолатда ҳам 2-ўриндаги "Насаф" 8-поғонадаги "шунқорлар"дан устунроқ.

"Шўртан" - "Андижон"

17 май санасида Ғузорда янги мураббийлар тўқнашувига гувоҳ бўламиз. 8-турдан бошлаб мураббийликка киришган Элдор Мойлиев айни шу баҳсдан "Андижон" устози сифатида Суперлигада илк учрашувини ўтказадиган Максим Шацкихга қарши. Икки жамоа ҳам ушбу учрашувга қуйи олтиликда етиб келмоқда. Бекорга олдинги мураббийлар истеъфога чиқарилмаган экан-да! Кўрамиз, қайси вақтинчалик мураббий клубга ғалаба олиб келаркин. Балки, шундан сўнг раҳбарият уларни доимийга ўзгартиришни ўйлаб кўрар. Наздимда, ўйинда кичик устунлик "Андижон" томонида.

"Бунёдкор" - "Навбаҳор"

Турнинг марказий учрашувларидан бири "Бунёдкор" стадионида ташкил қилинади. Кутилмаганда етакчилар орасида юрган "Бунёдкор", бу мавсумдан сал мақсадлари пастлаган "Навбаҳор"га қарши. Учрашув кучли жанг остида ва голларга бўй ўтиши таҳмин қилинмоқда. Бу мавсум "Навбаҳор" асосан Гедеш, Тейди ва Аугусто каби легионерларга таянмоқда. Балким, мана шу нарса ҳам жамоанинг салбий натижаларига таъсир кўрсатаётгандир. Ҳужумни ўтган йилни ёндирган Забиҳилло Ўринбоевнинг ҳам бу циклда олови пастлагандек. Ўринбоев ҳозиргача 2 гол ва 2 ассист қайд этди. Бу ўтган йилги ўзи билан солиштирганда анча кам. 

"Бунёдкор"да ҳозирча ишлар яхши. Илёс Зейтуллаев ёш ва тажрибали футболчилар уйғунлигини таъминлашни уддасидан чиқяпти. "Қалдирғоч"ларда ҳар бир позицияда биттадан кўпни кўрган, жамоани торта оладиган футболчилар бор. Масалан, ҳимояда Бобур Йўлдошев ҳамда 3 болқонлик легионерлар. Ярим ҳимояда жамоа юраги Одил Ҳамробеков, Расул Йўлдошев, Алишер Одиловдан (сўнгги кубок беллашувдаги тривелласи алоҳида эътирофга молик) ташқари грузиялик Ашортиа ҳам катта кўламда иш бажармоқда. Ҳужумда эса ажойиб тўққизлик ҳужумчилар йиғилиб қолган. Мураббий Темурхўжа Абдухолиқов, Азизбек Омонов ва Луис Качорридан ротациялар орқали бемалол фойдалана олади, фойдалана олмоқда ҳам. 

Тахминимча, беллашув тенг курашлар остида кечади, бироқ "Бунёдкор" ҳужумчиларининг тажрибалилиги асқатади. Кўп эҳтимол улар максимум голли вазиятларидан наф чиқара оладилар. Шунинг учун, баҳсда  мезбонларнинг ғалаба фоизи юқорироқдек. Бироқ голлар камида 2 тадан зиёдроқ бўлса керак.

"Хоразм" - "Машъал"

Суперлигага қайтган икки жамоа ҳам ҳали тўлиқ юқори лига ҳавосига мослашиб олганча йўқ. Буни натижалар ҳам исботлаб турибди. "Машъал" 9-турдан сўнг 11 очко билан 10-поғонада жойлашган эрса, хоразмликлар 8 баҳсдан сўнг 8-балл билан 14-ўринда кетмоқда. Икки жамоада ҳам аниқ ўйин сценарийси кўзга  ташланаётгани йўқ. Ҳауслар орқали клублар очколар олишмоқда, гўё. Шу сабабли, бу учрашувда бирор жамоага устунлик бера олмаймиз. Катта эҳтимоллар билан "Хоразм" - "Машъал" ўйини дуранг билан якунланса керак.

"Қизилқум" - "Пахтакор".

"Пахтакор" Тожиев бошчилигида олтиталаб гол уришга ўрганиб олди. Навоийда жуда олтита гол уриб юбормаса керак-ку, бироқ ҳаво алмашган жамоадан яна бир нечта ғалабалар кутиляпти, умиқ қилиняпти. Кубокда "Насаф"ни "ер тишлатгани" ҳам клубга устунлик беради. Юқори кайфият билан Навоийга боради. "Қизилқум"га ҳозирча барқарорлик етишмаяпти. Бир баҳсда ютса, кейинги икки ўйинда яна ғалаба қилади, деб ўз мухлислари ҳам ишона олишмаяпти. Турлича натижалар туфайли клуб 9-ўринда бораяпти. Бир томондан таркиб ҳам ёмонмас, терма жамоага номзод футболчилар бор. Ҳужумда Лобжанидзе, ярим ҳимояда Жамбули Жигаури каби яхши хорижликлар тўпланга бўлса-да, Никола Лазаревич тўлиқ уларни мурувватларини созлай олмаяпти, чоғи. Бир сўз билан айтганда, бир оёғи билан отнинг устига чиқаётган "шерлар" баҳсда фаворит. Ишончли ғалабага тўсиқ бўладиган ҳаракат "Қизилқум"да кузатилармикин, 18 май 21-00 дан бошлаб билиб оламиз.

ОКМК - "Нефтчи"

"Тур баҳси" дея аталаётган ўйин. 19 май куни соат 20:00 да бошланади. Олмалиқ шаҳрида 1 ҳамда 5-ўриндаги жамоалар курашини кўрамиз. Тўғри, Қосимов шогирдлари "камбеклар қироли"га айланиб олишди. Бироқ, камбек бўлиши учун клуб биринчи гол ўтказиб юбориши керак. Шундай экан, ОКМКда биринчи бўлимдаги  тушунмовчиликлар ва ҳимояланишда анчагина камчиликлар бор. "Нефтчи"нинг "қотил" ҳужумчилари бу нозик нуқталардан қанчалик фойдалана олиши, баҳс тақдирини ҳал қилса керак. Виталий Левченко ўзининг Фарғонанинг бош жамоасига мураббийлик қилишга лойиқлигини кўрсатиш учун яна бир имконият. Бу беллашув натижасини "Нефтчи"нинг қанча гол уриши ҳамда ҳимояда қанчалик бехато ўйнаши ҳал қилади. Жамоалар битта тўп фарқи билан 70-80 дақиқаларгача борадиган бўлишса, олмалиқликлар яна ремонтада қилиш потенциалига эга.

Икки клуб ҳам ҳафта ўртасида Ўзбекистон кубогидаги ғалабалар эвазига плей-оффга чиққанини ҳам қайд этиш лозим. Бу уларга қўшимча импулс ва мотивация бўлиб беради. Таркибдаги номларга қарангда энди, Суюнов, Йўлдошев, Сайфиев, Искандаров, Рўзиев, Алибоев, ҳужумда Табатадзе, Марушич. Нариги тарафда Раҳмонов, Комилов, Ўлмасалиев ,Тўхтахўжаев, Ғиёсов, Собиржонов, Санчес каби футболчилар йиғилган баҳсдан нега биз оловли учрашув кутмаслигимиз керак. Шунда ўйинларда майдон ёнмаса, бошқа қайси ўйинда ёнсин!

Хулоса қилиб айтганда, негадир яна ОКМКда камбек бўлади, деб ўйлаяпман. Таҳминимча, "Нефтчи" биринчи гол уради, лекин иккита жавоб қабул қилади.

Тур олди ўйинларига бироз кўз югуртирдик. Қарабсизки, турда иккита марказий, 6 та ўрта даражадаги матч бор. Биламизки, ном футболда ҳамма нарсани ҳал қилмайди. Шунинг учун ҳам барча учрашувни бирдек иштиёқ ва қизиқиш билан кузатишни таклиф қиламиз.

                                                                                                                                                                               

Яҳёхон Ғаниев